ზაფხულის სეზონის დაწყებასთან ერთად თურქეთში ტყის ხანძრებმა მნიშვნელოვნად იმატა, ოფიციალური მონაცემებით, 1 ივნისიდან 1516 ხანძარი დაფიქსირდა.
პრეზიდენტმა რეჯეფ თაიფ ერდოღანმა, ორშაბათს, X პლატფორმაზე გაკეთებულ განცხადებაში დაადასტურა, რომ ხანძრებთან მებრძოლი ჯგუფები 24 საათის განმავლობაში მუშაობენ, რომელთაც მხარს უჭერს საჰაერო ფლოტი, რომელიც შედგება 27 თვითმფრინავისგან, 105 ვერტმფრენისგან და 14 უპილოტო საფრენი აპარატისგან.
ხანძრების კონტროლის ქვეშ მოსაქცევად მობილიზებულია დაახლოებით 6000 სახანძრო მანქანა და პირველადი რეაგირების მანქანა, ასევე 25000 სატყეო პერსონალი.
ერდოღანმა განაცხადა: "ამ დროისთვის ხანძრებიდან 1507 კონტროლის ქვეშ არის მოქცეული. ჩვენმა თვითმფრინავებმა და ვერტმფრენებმა ჯამში 10 260 გაფრენა განახორციელეს და 33 200 ტონა წყალი დაასხეს".
ერდოღანმა ასევე განაცხადა, რომ ხანძრებზე პასუხისმგებლობის დადგენის შედეგად დაკავებულია 31 ადამიანი, რომელთაგან 10 დააპატიმრეს, ხოლო 10-ს აღკვეთის ღონისძიების სახით შეეფარდა პირობითი მსჯავრი.
პრეზიდენტმა ერდოღანმა ხანძრის შედეგად დაზარალებულ მოქალაქეებს თანადგომა გამოუცხადა და ხაზი გაუსვა, რომ ტყის ხანძრებიდან თითქმის ყველა, სამწუხაროდ, ადამიანის ფაქტორით არის გამოწვეული.
"ჩვენი სახელმწიფო, რა თქმა უნდა, ყველა ზომას იღებს, მაგრამ მინდა ყველას შევახსენო, რომ მთავარია ხანძრის გამომწვევი მიზეზი არ წარმოიშვას", - თქვა ერდოღანმა და მოქალაქეებს მოუწოდა მომდევნო ორი თვის განმავლობაში მაქსიმალური სიფრთხილე გამოიჩინონ და დაიცვან "მწვანე სამშობლო".
