ე.წ. „ბოსნიელმა ყასაბმა“ რატკო მლადიჩმა ჯანმრთელობის მდგომარეობის გამო ვადამდე გათავისუფლება მოითხოვა.
რატკო მლადიჩის ადვოკატმა განაცხადა, რომ მიუხედავად იმისა, რომ გაეროს სამედიცინო განყოფილება თავს იკავებს დაავადების მიმდინარეობასთან დაკავშირებით ოფიციალური განცხადების გაკეთებისგან, ყოფილი გენერალი სიცოცხლის ბოლოს უახლოვდება.
2017 წელს გენოციდისა და ომის დანაშაულებისთვის სამუდამო პატიმრობამისჯილმა ბოსნიელ სერბთა ყოფილმა მეთაურმა რატკო მლადიჩმა სამშაბათს ჯანმრთელობის პრობლემების გამო ვადამდე გათავისუფლება მოითხოვა.
გენერალმა, რომელიც 1992-1995 წლების ბოსნიის ომის დროს ჩადენილი სისასტიკის გამო ცნობილია როგორც „ბოსნიელი ყასაბი“, განაცხადა, რომ მას მხოლოდ რამდენიმე თვის სიცოცხლე დარჩა.
ყოფილი იუგოსლავიის საერთაშორისო სისხლის სამართლის ტრიბუნალმა მლადიჩი, რომელიც ამჟამად 80 წელს გადაცილებულია, დამნაშავედ ცნო სარაევოს ალყაში და 1995 წლის ივლისში სრებრენიცის ხოცვა-ჟლეტაში მისი როლისთვის, სადაც ბოსნიელ სერბთა ძალებმა დაახლოებით 8000 მუსლიმი მამაკაცი და ბიჭი მოკლეს.
AFP-ს მიერ ნანახი და მისი ადვოკატის მიერ წარდგენილი მოთხოვნის თანახმად, ყოფილი სამხედრო ლიდერი განუკურნებელი სენით იტანჯება და ნათქვამია, რომ „მისი დარჩენილი სიცოცხლე თვეებით იზომება“.
სიკვდილის პირას
წლების განმავლობაში მისი გარემოცვა მას ავადმყოფად და დასუსტებულად ახასიათებდა, ხოლო 2017 წელს მან ჯანმრთელობის მიზეზით დროებითი გათავისუფლება მოითხოვა.
მლადიჩი 16 წლიანი მიმალვის შემდეგ 2011 წელს სერბეთში დააკავეს. ამჟამად ის ჰააგაში იხდის სასჯელს.
მისი ვაჟი, დარკო მლადიჩი, რეგულარულად ესაუბრება სერბულ პრესას და აცხადებს, რომ მამამისის ჯანმრთელობის მდგომარეობა მძიმეა.
