დანიის საგარეო საქმეთა მინისტრმა ლარს ლიოკე რასმუსენმა პარასკევს განაცხადა, რომ უახლოეს ხანში იგეგმება ამერიკის შეერთებულ შტატებთან მოლაპარაკებების დაწყება გრენლანდიის საკითხზე, რაც არქტიკაში უსაფრთხოების გაძლიერებას ისახავს მიზნად.

კოპენჰაგენში ჟურნალისტებთან საუბრისას რასმუსენმა აღნიშნა: „ამ შეხვედრებს ძალიან მალე დავიწყებთ. თუმცა, ვინაიდან ამჟამად საჭიროა პროცესის ირგვლივ არსებული დრამის შემცირება, მოლაპარაკებების ვადებს არ გავამხელთ“. რასმუსენმა დასძინა, რომ მოლაპარაკებების მთავარი ფოკუსი იქნება „უსაფრთხოება, უსაფრთხოება და უსაფრთხოება“.

ამავდროულად, ნატოს ლიდერი მარკ რუტე და დანიის პრემიერ-მინისტრი მეტე ფრედერიკსენი პარასკევს შეთანხმდნენ, რომ ალიანსმა უნდა გააძლიეროს მუშაობა არქტიკის უსაფრთხოების კუთხით მას შემდეგ, რაც აშშ-ის პრეზიდენტმა დონალდ ტრამპმა გრენლანდიის ხელში ჩაგდების მუქარაზე უკან დაიხია.

ბრიუსელში ფრედერიკსენთან შეხვედრის შემდეგ რუტემ სოციალურ ქსელ X-ზე დაწერა: „ჩვენ ერთად ვმუშაობთ მთელი ნატოს უსაფრთხოების უზრუნველსაყოფად და გავაფართოებთ თანამშრომლობას არქტიკაში შეკავებისა და თავდაცვის გასაძლიერებლად“. ვრცელდება ინფორმაცია, რომ ამ კვირაში დავოსში რუტემ ტრამპთან გრენლანდიის საკითხზე კონსენსუსს მიაღწია, თუმცა შეთანხმების დეტალები არ გასაჯაროებულა.

მეორე მხრივ, მას შემდეგ, რაც ტრამპმა მუქარა უკან წაიღო, მოსალოდნელია, რომ ფრედერიკსენი გრენლანდიის დედაქალაქ ნუუკში გაემგზავრება და იქ თავის კოლეგას შეხვდება. ფრედერიკსენმა X-ის საკუთარ ანგარიშზე დააანონსა, რომ ბრიუსელიდან ნუუკში გაემგზავრება.