ოფიციალური პირების განცხადებით, ჩინეთის აღმოსავლეთ ნაწილში, ფეიერვერკების მაღაზიაში მომხდარი აფეთქების შედეგად რვა ადამიანი დაიღუპა, ორი კი დაშავდა.
ჩინეთის სოფლებში მცხოვრებლები ისეთ მნიშვნელოვან დღესასწაულებსა და მოვლენებს, როგორიცაა მთვარის კალენდრით ახალი წელი, ჩვეულებრივ, ასაფეთქებლებითა და ხმამაღალი ფეიერვერკებით აღნიშნავენ.
ადგილობრივი ხელისუფლების მიერ სოციალურ ქსელში გავრცელებული ინფორმაციით, აფეთქება ძიანსუს პროვინციის დუნხაის რაიონში მდებარე ერთ-ერთ მაღაზიაში კვირას, დაახლოებით 14:30 საათზე მოხდა. მიზეზი ერთი ან რამდენიმე პირის მიერ ფეიერვერკების „არასათანადო გამოყენება“ გახდა.
„საგანგებო სიტუაციების მართვის, სახანძრო, საზოგადოებრივი უსაფრთხოებისა და ჯანდაცვის სამსახურები დაუყოვნებლივ მივიდნენ შემთხვევის ადგილზე სამაშველო და რეაგირების ოპერაციების განსახორციელებლად“, - დასძინეს დუნხაის ოფიციალურმა პირებმა.
უსაფრთხოების სტანდარტები
განცხადებაში აღნიშნულია, რომ აფეთქებით გამოწვეული ხანძარი დაახლოებით 16:00 საათისთვის ლიკვიდირებული იყო. დაღუპულია რვა ადამიანი, ორმა კი მსუბუქი დამწვრობა მიიღო.
გამოძიება გრძელდება, პასუხისმგებელი პირები კი დაკავებულები არიან.
საგანგებო სიტუაციების მართვის სამინისტრომ განაცხადა, რომ ჩინეთში ახალი წლის დღესასწაულებზე ფეიერვერკების გამოყენება პიკს აღწევს და მოქალაქეები გააფრთხილა ისეთი სახიფათო ქმედებებისგან, როგორიცაა ფეიერვერკების საცდელი გაშვება ან მაღაზიებთან სიგარეტის მოწევა.
სამინისტრომ ასევე დაამატა, რომ ქვეყნის მასშტაბით ფეიერვერკებით მოვაჭრე საწარმოებს გაეგზავნათ გაფრთხილება უსაფრთხოების რისკებისა და საფრთხეების „სრული შემოწმების“ აუცილებლობის შესახებ.
ჩინეთში უსაფრთხოების არასაკმარისად მკაცრი სტანდარტები ხშირად ხდება ინდუსტრიული ავარიების მიზეზი.
მიმდინარე თვეში, ჩინეთის ჩრდილოეთით მდებარე შანსის პროვინციაში, ბიოტექნოლოგიურ ქარხანაში მომხდარი აფეთქების შედეგად რვა ადამიანი დაიღუპა. იანვრის ბოლოს კი, შიდა მონღოლეთის პროვინციაში, ფოლადის ქარხანაში მომხდარ აფეთქებას სულ მცირე ცხრა ადამიანი ემსხვერპლა.
