ეგვიპტური სახელმწიფო მედიის ინფორმაციით, ეგვიპტეში ჰამასსა და შუამავლებს შორის ღაზაში ცეცხლის შეწყვეტის შესახებ მოლაპარაკებების პირველი რაუნდი „პოზიტიურ ატმოსფეროში“ დასრულდა.
„ალ-კაჰერა ნიუსის“ ცნობით, მოლაპარაკებები წითელი ზღვის სანაპიროზე მდებარე კურორტ შარმ ელ-შეიხში გაიმართა და ახალი რაუნდები დღის განმავლობაში დაიწყება.
ისრაელის დელეგაციაც ორშაბათს ქალაქში ჩავიდა არაპირდაპირი მოლაპარაკებებისთვის.
მოლაპარაკებები ფოკუსირებულია აშშ-ის პრეზიდენტის, დონალდ ტრამპის წინადადებაზე, რომელიც ითვალისწინებს გრძელვადიან ცეცხლის შეწყვეტას და ტყვეების გაცვლას ისრაელსა და ხამასს შორის.
„პოზიტიური ატმოსფერო“
ეგვიპტური წყაროების ცნობით, შუამავლებსა და ხამასს შორის შეხვედრები კონსტრუქციული იყო და დაეხმარა არსებული მოლაპარაკებებისთვის საგზაო რუკის შექმნას.
გავრცელებული ინფორმაციით, ხამასის წარმომადგენლებმა შუამავლებს განუცხადეს, რომ ღაზაში ისრაელის დაბომბვის გაგრძელება მნიშვნელოვნად ართულებს ტყვეების გაცვლის საკითხში პროგრესის მიღწევას.
ხამასსა და ისრაელს შორის არაპირდაპირი მოლაპარაკებები ორშაბათს საღამოს დაიწყო ეგვიპტის, ყატარისა და აშშ-ის შუამავლობით.
მოლაპარაკებების მიზანია ტრამპის გასულ კვირას გამოცხადებული გეგმის განსახორციელებლად საჭირო პირობების შექმნა.
ტრამპის განცხადება "მნიშვნელოვანი პროგრესის" შესახებ
ორშაბათს საღამოს თეთრ სახლში საუბრისას ტრამპმა განაცხადა, რომ მისი აზრით, „დიდი პროგრესი“ მიღწეულია ღაზას საკითხზე შეთანხმების მისაღწევად.
„ვფიქრობ, ღაზას შეთანხმებასთან დაკავშირებით ყველაფერი ძალიან კარგად მიდის,“ - თქვა ტრამპმა და აღნიშნა, რომ ხამასი „ძალიან კარგად იქცევა“ და „მნიშვნელოვან საკითხებზე თანხმდება“.
მან თავის გეგმას „საოცარი შეთანხმება, რომელზეც ყველა შეთანხმდა“ უწოდა და განაცხადა, რომ ყველა მხარე მუშაობს გეგმის დასასრულებლად.
ტრამპმა თქვა, რომ ისრაელის პრემიერ-მინისტრი ბენიამინ ნეთანიაჰუ წინადადებას „პოზიტიურად“ მიუდგა და რომ მან ასევე ისაუბრა თურქეთის პრეზიდენტ რეჯეფ თაიფ ერდოღანთან, რომელიც „აქტიურად მუშაობს ღაზას შეთანხმებისთვის“.
