ისრაელის ოფიციალურმა პირებმა ორშაბათს განაცხადეს, რომ ღაზაში რაფაჰის გამშვები პუნქტი ორივე მიმართულებით პალესტინელი პაციენტების გადაადგილებისთვის გაიხსნა.
ეგვიპტურმა მედიამ დაადასტურა ინფორმაცია და აღნიშნა, რომ პუნქტი დღეში ორივე მიმართულებით 50 ადამიანის გატარებას უზრუნველყოფს.
მას შემდეგ, რაც თითქმის ორი წლის წინ, ღაზის ომის დროს, ისრაელმა ეს ტერიტორია დაიკავა, ღაზაში მცხოვრები პალესტინელები დიდი შფოთვით ელოდნენ ამ მნიშვნელოვანი გასასვლელის უფრო ფართო მასშტაბით გახსნას.
საერთაშორისო ზეწოლისა და ჰუმანიტარული ორგანიზაციების მრავალთვიანი მოწოდებების შემდეგ, სასაზღვრო პუნქტი კვირას მკაცრი შეზღუდვებით, პილოტურ რეჟიმში ამუშავდა.
ისრაელის სახელმწიფო მაუწყებლის, „კანის“ ცნობით, ორშაბათს ეგვიპტეში გადასვლას დაახლოებით 150 ადამიანი ელოდა, მათგან 50-მდე პაციენტი იყო, ხოლო ღაზაში შესვლას დაახლოებით 50 ადამიანი გეგმავდა.
მოსალოდნელია, რომ გამშვები პუნქტი დღეში დაახლოებით ექვსი საათის განმავლობაში იმუშავებს.
„ამჟამად 200 პაციენტი ელოდება“
ეგვიპტის მხარეს სასწრაფო დახმარების მანქანები უკვე ჩამწკრივდნენ ევაკუირებულთა მისაღებად.
ღაზის ჯანდაცვის სამინისტრომ განაცხადა, რომ ამჟამად მგზავრობის ნებართვას დაახლოებით 200 პაციენტი ელოდება.
მუჰამედ ნასირმა, რომელმაც ომის ადრეულ ეტაპზე დაზიანებები მიიღო და ცალი ფეხი დაკარგა, განაცხადა: „რაფაჰის გამშვები პუნქტი სიცოცხლის ხაზია. მე მჭირდება ოპერაცია, რომელიც ღაზაში ვერ კეთდება, მაგრამ შესაძლებელია საზღვარგარეთ“.
რაფაჰი ღაზის ერთადერთი გამშვები პუნქტია, რომელიც ისრაელზე არ გადის და იგი დიდი ხანია ჰუმანიტარული დახმარების კრიტიკულ არტერიას წარმოადგენს. მას შემდეგ, რაც 2024 წლის მაისში ისრაელის ძალებმა მასზე კონტროლი დაამყარეს, პუნქტი დახურული იყო, გარდა მიმდინარე წლის დასაწყისში მცირეხნიანი და შეზღუდული გახსნისა.
ჰუმანიტარული ორგანიზაციები აღნიშნავენ, რომ 10 ოქტომბრიდან მოქმედი ზავის მიუხედავად, ღაზაში პირობები კვლავ მძიმეა.
COGAT-მა, ისრაელის თავდაცვის სამინისტროს ორგანომ, რომელიც პალესტინის სამოქალაქო საკითხებს კოორდინირებს, განაცხადა, რომ ორშაბათიდან დაიწყებოდა მხოლოდ ინდივიდების გადაადგილება „ორივე მიმართულებით“, თუმცა დახმარების ტვირთების მნიშვნელოვნად გაზრდის შესახებ განცხადება არ გაუკეთებია.
ეგვიპტის საავადმყოფოები მზად არიან ღაზიდან პაციენტების მისაღებად
ეგვიპტური „Cairo News“-ის ცნობით, გამშვები პუნქტი „24 საათის განმავლობაში“ ღია დარჩება და ეგვიპტის საავადმყოფოები მზად არიან ღაზიდან პაციენტების მისაღებად.
პუნქტის გახსნა მოჰყვა გასულ კვირას ისრაელის მიერ ღაზაში დაკავებული ბოლო მძევლის, რან გვილის ნეშტის დაბრუნებასა და დაკრძალვას. ეს არის ნაბიჯი, რომელსაც ისრაელის ოფიციალური პირები მანამდე რაფაჰის ეტაპობრივ გახსნას უკავშირებდნენ.
ისრაელის თავდასხმები გრძელდება
პუნქტის მუშაობის განახლების პარალელურად, ისრაელის თავდასხმები გრძელდებოდა.
ღაზის სამოქალაქო თავდაცვამ განაცხადა, რომ შაბათს ისრაელის დარტყმების შედეგად სულ მცირე 32 ადამიანი დაიღუპა.
ისრაელის არმია ამტკიცებს, რომ აღნიშნულ სამიზნეებს მას შემდეგ დაარტყა, რაც რაფაჰის გვირაბიდან მებრძოლები გამოვიდნენ. ამ მტკიცების გადამოწმება რთულია, რადგან თელ-ავივი მუდმივად უკრძალავს დამოუკიდებელ დამკვირვებლებს ალყაში მოქცეულ რეგიონში შესვლას.
გარდა ამისა, ისრაელმა კვირას განაცხადა, რომ წყვეტს ჰუმანიტარულ ოპერაციებს ორგანიზაცია „ექიმები საზღვრებს გარეშე“ (MSF) ჯგუფთან, რადგან მათ უარი თქვეს პალესტინელი პერსონალის სიის გადაცემაზე. MSF-ში აცხადებენ, რომ მსგავსი მოთხოვნა მათ თანამშრომლებს საფრთხეში ჩააგდებს.
მეორე მხრივ, ეგვიპტისა და იორდანიის ლიდერებმა კიდევ ერთხელ დაადასტურეს, რომ გმობენ პალესტინელების ღაზიდან გაყვანის ნებისმიერ მცდელობას. არსებობს რეგიონული შეშფოთება, რომ მსგავსმა შეზღუდულმა გახსნებმა შესაძლოა შენიღბოს მოსახლეობის მასობრივი გადასახლების უფრო ფართო გეგმები.
