თურქეთის რესპუბლიკის პრეზიდენტმა, რეჯეფ თაიფ ერდოღანმა განაცხადა, რომ დედაქალაქ ანკარაში გამართული ნატოს 36-ე სამიტი წარმატებით დასრულდა. მან მადლობა გადაუხადა მონაწილეებს, ორგანიზატორებსა და დედაქალაქის მაცხოვრებლებს ღონისძიების წარმატებით ჩატარებაში შეტანილი წვლილისთვის.
სოციალური მედიის, პლატფორმა X-ზე გამოქვეყნებულ პოსტში ერდოღანმა აღნიშნა: „წარმატებით დავასრულეთ ნატოს სახელმწიფოთა და მთავრობის მეთაურების 36-ე სამიტი, რომელსაც თურქეთის მასპინძლობით ანკარაში ვუმასპინძლეთ. საპრეზიდენტო კომპლექსში გამართულ სამიტში, ნატოს წევრი 32 სახელმწიფოსა და მთავრობის მეთაურის გარდა, მონაწილეობდა 100-მდე მინისტრი, მაღალი რანგის დიპლომატი, საერთაშორისო ორგანიზაციების წარმომადგენელი და მოწვეული სტუმარი. სამიტის მსვლელობისას დაცული იყო მგრძნობიარე ბალანსი უსაფრთხოების უმაღლეს დონეზე უზრუნველყოფასა და ჩვენი მოქალაქეების უფლებებისა და თავისუფლებების დაცვას შორის“.
ერდოღანის თქმით, უსაფრთხოების, ტრანსპორტირების, კოორდინაციისა და საზოგადოებრივი წესრიგის დაცვის ღონისძიებები საგულდაგულოდ დაიგეგმა ლიდერების უსაფრთხოების, ქალაქის ცხოვრების მდგრადობისა და საერთაშორისო საზოგადოების სწორად ინფორმირების მიზნით; ამასთან, განსაკუთრებული მნიშვნელობა მიენიჭა იმას, რომ არ შეფერხებულიყო მოქალაქეების ყოველდღიური ცხოვრება.
პრეზიდენტმა პოსტში ასე განაგრძო: „საპრეზიდენტო ეროვნული ბიბლიოთეკა საერთაშორისო მედიაცენტრად მუშაობდა; მედიის წარმომადგენლებს შესთავაზეს 1800-ადგილიანი სამუშაო სივრცე, 40 სამონტაჟო ოთახი და მრავალი პირდაპირი ტრანსლაციის წერტილი. სამიტს რეკორდული რაოდენობის - 2500-ზე მეტი მედიის წარმომადგენელი ადევნებდა თვალს; TRT-ის კოორდინაციით, 96 კამერით, 18 მოძრავი გადამცემი სადგურით და 26 სხვადასხვა წერტილიდან განხორციელებული ტრანსლაციით, ანკარის სამიტი მთელ მსოფლიოს გადაეცემოდა“.
ერდოღანმა ასევე აღნიშნა, რომ სამიტმა „მნიშვნელოვანი წვლილი“ შეიტანა ანკარის საერთაშორისო პოპულარიზაციაში.
პრეზიდენტმა ხაზი გაუსვა, რომ სამიტმა დიდი წვლილი შეიტანა ანკარის რეკლამირებაში და დასძინა: „გულწრფელ მადლობას ვუხდი ჩემს თანამოქალაქეებს ანკარაში იმ მოთმინებისა და უნიკალური სტუმართმოყვარეობისთვის, რომელიც მათ სამიტის განმავლობაში გამოიჩინეს“.
ერდოღანმა მადლიერება გამოხატა ყველას მიმართ, ვინც თავდადებით მუშაობდა სამიტის შეუფერხებლად ჩატარებისთვის - სამართალდამცავებით დაწყებული, მედიით, ტექნიკური პერსონალით, ჯანდაცვის, ტრანსპორტის, პროტოკოლისა და კვების სფეროს წარმომადგენლებით დასრულებული. მან ასევე მადლობა გადაუხადა ნატოს გენერალურ მდივანს, მარკ რუტეს „სამიტის მომზადებასა და განხორციელებაში გამოჩენილი თანამშრომლობაზე ორიენტირებული მიდგომისა და ძალისხმევისთვის“.
