რუსეთის მიერ ორი ქალაქის აღების შესახებ გავრცელებული ცნობის შემდეგ, პუტინი კონფლიქტის ზონას ეწვია

კრემლმა ორშაბათს განაცხადა, რომ რუსეთის პრეზიდენტი ვლადიმერ პუტინი უკრაინაში კონფლიქტის ზონას ეწვია.

კრემლის განცხადებით, პუტინმა გენერალური შტაბის უფროსისგან, ვალერი გერასიმოვისგან, ასევე ცენტრალური დაჯგუფების სარდლისგან, ვალერი სოლოდჩუკისგან და დაჯგუფება „ვოსტოკის“ (აღმოსავლეთი) სარდლისგან, ანდრეი ივანაევისგან ანგარიში მოისმინა.

პუტინს მიაწოდეს ინფორმაცია ფრონტზე არსებული ვითარების შესახებ. რუსი სამხედრო მაღალჩინოსნების თქმით, დონეცკის ოლქში მდებარე პოკროვსკი და ხარკოვის ოლქში მდებარე ვოვჩანსკი რუსეთის კონტროლის ქვეშ გადავიდა.

პუტინმა მადლობა გადაუხადა მეთაურებსა და ჯარისკაცებს, ხაზი გაუსვა პოკროვსკის რეგიონში მიღწეული წარმატების მნიშვნელობას და განაცხადა: „ეს საშუალებას მოგვცემს, სტაბილურად მივაღწიოთ ყველა იმ ძირითად მიზანს, რომლებიც სპეციალური სამხედრო ოპერაციის დასაწყისში დაისახა და რომელთა წინაშეც ჩვენ ვდგავართ“.

გერასიმოვმა კი აღნიშნა, რომ უკრაინული ძალები ცდილობენ ალყიდან დაიხსნან თავიანთი ქვედანაყოფები კუპიანსკისა და პოკროვსკის მიმართულებებზე და სხვა ფრონტებზე კონტრშეტევები წამოიწყეს.

სავარაუდო ტერიტორიული წარმატებები

დაჯგუფება „ვოსტოკის“ სარდალმა ივანაევმა განაცხადა, რომ ზაპოროჟიესა და დნეპროპეტროვსკის ოლქებში წინსვლა შეიმჩნევა.

ივანაევის მტკიცებით, რუსული ძალები ქალაქ გულიაიპოლეში შევიდნენ და დასახლება დობროპილია დაიკავეს.

უკრაინის პრეზიდენტმა ვოლოდიმირ ზელენსკიმ მანამდე დაადასტურა, რომ რუსი სამხედროების მიერ ნახსენებ რეგიონებში ვითარება უკიდურესად დაძაბულია.

პოკროვსკზე საუბრისას ზელენსკიმ განაცხადა: „არავინ აიძულებს მათ [ჯარისკაცებს], ნანგრევებისთვის მოკვდნენ. მე მხარს დავუჭერ იქ მყოფ ჯარისკაცებს, განსაკუთრებით მეთაურებს, რათა მათ შეძლონ სიტუაციის კონტროლი“.

უკრაინის პრეზიდენტის თქმით, პოკროვსკზე კონტროლის დამყარებით რუსეთი შეეცდება „დაარწმუნოს“ აშშ-ის პრეზიდენტი დონალდ ტრამპი იმაში, რომ კონფლიქტის დასასრულებლად უკრაინამ დონბასი უნდა დატოვოს.

თუმცა ზელენსკიმ აღნიშნა, რომ კიევი ამ რეგიონზე პრეტენზიაზე უარს ვერ იტყვის: „ხალხი ამას ვერ გაიგებს, საზოგადოება ამას ვერ გაიგებს“.