სამშაბათს გავრცელებულ განცხადებაში NISA-მ აღნიშნა, რომ ჩაატარა ოთხი ოპერაცია, რომელთა შედეგადაც „ალ-შაბაბის“ სულ მცირე 23 ტერორისტი განადგურდა. სააგენტოს ინფორმაციით, ოპერაციები საერთაშორისო უსაფრთხოების პარტნიორებთან კოორდინაციით, ქვეყნის სამხრეთ-ცენტრალურ ნაწილში, ჰირშაბელეს შტატის ჰიირანისა და შუა შაბელეს რეგიონებში განხორციელდა.
უწყების განმარტებით, ტერორისტები იმ დროს გახდნენ სამიზნეები, როდესაც ისინი შტატის ტერიტორიაზე თავდასხმების დასაწყებად ემზადებოდნენ.
„ეს პრევენციული ოპერაციები მას შემდეგ ჩატარდა, რაც NISA-მ მიიღო სადაზვერვო ინფორმაცია იმის შესახებ, რომ „ხარიჯიტების“ დაჯგუფება მახასის დასახლებასთან ახლოს, ვაბ-ვეინისა და გობოს რაიონებში მებრძოლების მობილიზებას ახდენდა“, - ნათქვამია განცხადებაში.
„ხარიჯიტები“ არის ტერმინი, რომელსაც სომალის მთავრობა „ალ-ქაიდასთან“ დაკავშირებული ტერორისტული დაჯგუფება „ალ-შაბაბის“ აღსანიშნავად იყენებს.
განცხადების თანახმად, ოპერაციების დროს ასევე განადგურდა ტერორისტული ბანაკი, რომელიც ჰიირანის რეგიონში, დაბა მოქოკორიში მდებარეობდა. „ალ-შაბაბი“ 16 წელზე მეტია სომალის მთავრობის წინააღმდეგ ამბოხებულ საქმიანობას ეწევა და ხშირად ესხმის თავს უსაფრთხოების ძალებს, მაღალჩინოსნებსა და მშვიდობიან მოსახლეობას.
გასული წლის ივლისიდან მოყოლებული, სომალის არმიამ, აფრიკის კავშირის მხარდაჭერისა და სტაბილიზაციის მისიისა და სხვა საერთაშორისო პარტნიორების დახმარებით, „ალ-შაბაბის“ წინააღმდეგ ოპერაციები გააძლიერა. დეკემბერში, გაეროს უშიშროების საბჭომ ბრიტანეთის მიერ მხარდაჭერილი რეზოლუციით აფრიკის კავშირის მისიას მანდატი კიდევ ერთი წლით, 31 დეკემბრამდე გაუხანგრძლივა.
