ჩრდილოეთ ერაყში მეთანის გაზს 12 თურქი სამხედრო ემსხვერპლა

თავდაცვის სამინისტრომ ორშაბათს განაცხადა, რომ ჩრდილოეთ ერაყში საძიებო ოპერაციის დროს მეთანის გაზის ზემოქმედების შედეგად 12 თურქი სამხედრო დაიღუპა.

ინციდენტი კვირას მოხდა "კლანჭი-ბლოკირების" ოპერაციის ზონაში, 852 მეტრის სიმაღლეზე მდებარე გამოქვაბულში, საძიებო-გამწმენდი სამუშაოების დროს, სადაც ტერორისტული ორგანიზაცია PKK-ს წევრები იყვნენ თავშეფარებული.

ოპერაციის დროს, რომელიც 2022 წელს PKK-ს ტერორისტების მიერ მოკლული ჯარისკაცის ნეშტის ძებნის ნაწილი იყო, 19 ადამიანი მოიწამლა გაზით, ოთხი ადამიანის გარდაცვალების შედეგად კი დაღუპულთა საერთო რაოდენობა 12-მდე გაიზარდა.

მინისტრი იაშარ გიულერი უმაღლეს სამხედრო სარდლებთან ერთად გაემგზავრა რეგიონში და ადგილზე შეისწავლა სიტუაცია, ასევე დაესწრო დაღუპულთა გამოსამშვიდობებელ ცერემონიებს.

სამინისტრომ განცხადებაში აღნიშნა: "კიდევ ერთხელ ვუსურვებ ალაჰის წყალობას ჩვენს ძვირფას დაღუპულებს, ვუსამძიმრებ მათ მწუხარე ოჯახებს, თურქეთის შეიარაღებულ ძალებს და ჩვენს კეთილშობილ ერს და ვუსურვებ მოთმინებას".

PKK, რომელიც აშშ-სა და ევროკავშირის მიერ ტერორისტულ ორგანიზაციად არის აღიარებული, 40 წელზე მეტია, რაც თურქეთის წინააღმდეგ სისხლიან აჯანყებას ახორციელებს.

ამ საფრთხეების საპასუხოდ, თურქეთმა 2022 წელს წამოიწყო ოპერაცია "კლანჭი-ბლოკირება" და მიზანში ამოიღო PKK-ს კუთვნილი თავშესაფრები ერაყის ჩრდილოეთში, მეტინას, ზაპისა და ავაშინ-ბასიანის რეგიონებში.

PKK ხშირად იყენებს ერაყის ჩრდილოეთს, როგორც ბაზას თურქეთზე ტრანსსასაზღვრო თავდასხმების დასაგეგმად და განსახორციელებლად.

თურქეთის ხელისუფლებამ არაერთხელ ხაზგასმით აღნიშნა, რომ ანკარის ქმედებები შეესაბამება გაეროს წესდების 51-ე მუხლს და იყენებს თავდაცვის კანონიერ უფლებას შეიარაღებული თავდასხმების შემთხვევაში.

გარდა ამისა, თურქეთსა და ერაყს შორის ორმხრივი შეთანხმებები თურქეთს საშუალებას აძლევს განახორციელოს კონტრტერორისტული ოპერაციები ერაყის ტერიტორიაზე.