ეგვიპტის ტურიზმისა და სიძველეების სამინისტრომ განაცხადა, რომ პენსილვანიის უნივერსიტეტის ეგვიპტურ-ამერიკულმა არქეოლოგიურმა ჯგუფმა, ეგვიპტის სამხრეთით, აბიდოსში მდებარე ჯებელ ანუბისის ნეკროპოლისში მეორე გარდამავალი პერიოდის სამეფო სამარხი აღმოაჩინა.
სამინისტროს განცხადებით, ეგვიპტის სიძველეების უმაღლესი საბჭოსთან არსებულმა კიდევ ერთმა არქეოლოგიურმა ჯგუფმა სუჰაგის პროვინციის სოფელ ბანავეეტში რომაული პერიოდის კერამიკის სახელოსნო აღმოაჩინა.
"აბიდოსში სამეფო სამარხის აღმოჩენა ახალ სამეცნიერო მტკიცებულებებს იძლევა ჯებელ ანუბისის ნეკროპოლისში სამეფო დაკრძალვების განვითარების შესახებ", - ნათქვამია განცხადებაში და აღნიშნულია, რომ ეს სამარხები თარიღდება ძვ. წ. 1700-დან 1600 წლამდე პერიოდით.
ბანავეეტში კერამიკის სახელოსნოსთან დაკავშირებით აღინიშნა, რომ ის უძველეს დროში რეგიონისთვის კერამიკისა და მინის ნაწარმის მიმწოდებელი ერთ-ერთი უდიდესი საწარმოო ცენტრი იყო.
სამინისტრომ ასევე აღნიშნა, რომ ეს აღმოჩენები არა მხოლოდ ხელს უწყობს ეგვიპტის ტურიზმის მრავალფეროვნებისა და უძველესი ცივილიზაციის მსოფლიოსთვის გაცნობას, არამედ მკვლევრებისთვის მნიშვნელოვან ინფორმაციას იძლევა.
