ხუთშაბათს, მადაგასკარის დედაქალაქ ანტანანარივუში, მთავრობის საწინააღმდეგო მსვლელობაში სულ მცირე 1000-მა ადამიანმა მიიღო მონაწილეობა, რომლებიც პრეზიდენტ ანდრი რაჯოელინას გადადგომას მოითხოვდნენ.
აღნიშნული პროტესტები კუნძულზე წლების განმავლობაში მომხდარი ყველაზე დიდი არეულობების ფონზე მიმდინარეობს, რა დროსაც პოლიციამ მომიტინგეების დასაშლელად ცრემლსადენი გაზი, ხმოვანი ყუმბარები და პლასტმასის ტყვიები გამოიყენა.
"Gen Z Madagascar"-ის სახელწოდებით სტუდენტებისა და ახალგაზრდებისგან შემდგარი კოალიციის მიერ ორგანიზებული პროტესტები თავდაპირველად წყლისა და ელექტროენერგიის გათიშვამ გამოიწვია, თუმცა მალევე რაჯოელინას გადადგომის მოთხოვნით მოძრაობაში გადაიზარდა. პრეზიდენტის მიერ მთავრობის დათხოვნა და ზოგიერთ სამინისტროში ახალი დანიშვნების განხორციელება წესრიგის დამყარებას ვერ დაეხმარა.
ოთხშაბათს რაჯოელინამ გადადგომის მოთხოვნით გამოსულები ქვეყნის განადგურების სურვილში დაადანაშაულა, ხოლო სახელმწიფო სასახლეში გამართულ შეხვედრაზე განაცხადა, რომ ქვეყნის ბედს ერთ წელიწადში შეცვლიდა.
მომიტინგეების ადვოკატებმა ჟურნალისტებს განუცხადეს, რომ მათი 28 კლიენტი ოფიციალური ბრალდებებით პროკურატურაში გადაიყვანეს.
