ჩრდილოეთ კორეამ დაადასტურა, რომ გიგანტური კალიბრის ზალპური ცეცხლის რეაქტიული სისტემის საცდელი გაშვება წარმატებით განახორციელა. ლიდერმა კიმ ჩენ ინმა ქვეყნის ბირთვული შეკავების შესაძლებლობებისა და თავდასხმითი ძალის კიდევ უფრო გაძლიერების პირობა დადო.
სახელმწიფო საინფორმაციო სააგენტო KCNA-ს ოთხშაბათის ცნობით, გამოცდა სამშაბათს ჩრდილოეთ კორეის სარაკეტო სამმართველოს მიერ ჩატარდა იმ მიზნით, რომ შეემოწმებინათ ახალი ტექნოლოგიებით მოდერნიზებული გამშვები სისტემის ეფექტურობა. გაშვების პროცესს, მაღალჩინოსნებთან ერთად, პირადად კიმ ჩენ ინი ზედამხედველობდა.
KCNA-ს თანახმად, გამოცდის დროს გაშვებულმა ოთხმა რაკეტამ ზუსტად გაანადგურა საზღვაო სამიზნე, რომელიც პოლიგონიდან დაახლოებით 358 კილომეტრის დაშორებით მდებარეობდა.
„დიდი მნიშვნელობა აქვს“
კიმმა აღნიშნა, რომ განხორციელებულმა განახლებებმა სისტემის დარტყმის ძალა მაქსიმალურ დონემდე გაზარდა და განაცხადა, რომ ამ გამოცდას „დიდი მნიშვნელობა“ აქვს ჩრდილოეთ კორეის სტრატეგიული შეკავების გაძლიერების თვალსაზრისით.
„დარწმუნებული ვარ, რომ სულ მცირე რამდენიმე წლის განმავლობაში ვერცერთი სხვა ქვეყანა ვერ შეძლებს ამ ტექნოლოგიის ათვისებას ან მსგავსი შესაძლებლობის ქონას“, - განაცხადა კიმმა და დასძინა: „ეს შედეგები სერიოზულ საფრთხეს შეუქმნის იმ ძალებს, რომლებიც ფხენიანთან სამხედრო კონფლიქტს ესწრაფვიან“.
მან ასევე აღნიშნა, რომ კორეის შრომის პარტიის მომავალ ყრილობაზე წარმოდგენილი იქნება სტრატეგიული გეგმები ბირთვული შეკავების შემდგომი გაძლიერების შესახებ და კიდევ ერთხელ დაადასტურა, რომ ურყევი თავდასხმითი პოტენციალის შექმნა პარტიის პოლიტიკის ქვაკუთხედად რჩება.
ეს ინფორმაცია მას შემდეგ გავრცელდა, რაც იაპონიამ და სამხრეთ კორეამ სამშაბათს განაცხადეს ჩრდილოეთ კორეის მიერ იაპონიის ზღვის (აღმოსავლეთ ზღვის) მიმართულებით ორი ბალისტიკური რაკეტის გაშვების შესახებ. ეს იყო ფხენიანის რეჟიმის მიერ ამ თვეში განხორციელებული რაკეტების მეორე გაშვება.
ჩრდილოეთ კორეის მიერ იარაღის გამოცდის მასშტაბების გაფართოება კვლავ ზრდის დაძაბულობას კორეის ნახევარკუნძულზე და იწვევს აშშ-სა და მისი მოკავშირეების მძაფრ რეაქციას.
