თურქეთის რესპუბლიკის პრეზიდენტმა რეჯეფ თაიფ ერდოღანმა მკაცრად დაგმო ისრაელის საჰაერო თავდასხმები ირანზე და აღნიშნა, რომ ეს არის სახიფათო ესკალაცია, რომელიც საფრთხეს უქმნის რეგიონულ და გლობალურ სტაბილურობას.
პარასკევს ოფიციალურ X-ის გვერდზე გამოქვეყნებულ განცხადებაში ერდოღანმა თქვა: "ისრაელმა ჩვენი რეგიონის, განსაკუთრებით კი ღაზის, სისხლით, ცრემლებითა და არასტაბილურობით ავსების სტრატეგია დღეს ძალიან საშიშ დონეზე აიყვანა".
მეზობელი ირანის წინააღმდეგ განხორციელებული თავდასხმები "საერთაშორისო სამართლის სრული იგნორირების აშკარა პროვოკაციად" შეაფასა და ყურადღება გაამახვილა იმაზე, რომ თავდასხმები მოხდა ბირთვული მოლაპარაკებების კრიტიკულ პერიოდში და იმ დროს, როდესაც იზრდება საერთაშორისო ზეწოლა ისრაელზე ღაზაში განხორციელებული ქმედებების გამო.
"ეს თავდასხმები ცხადყოფს ნეთანიაჰუს ადმინისტრაციის მენტალიტეტს, რომელიც უგულებელყოფს კანონს", - თქვა ერდოღანმა და გააკეთა გაფრთხილება, რომ ისრაელის "უგუნური და აგრესიული ქცევა" რეგიონსა და მსოფლიოს კატასტროფისკენ უბიძგებს.
„ჩვენ მტკიცედ ვგმობთ მოღალატურ თავდასხმებს ჩვენს მეზობელ ირანზე“
ერდოღანმა მოუწოდა საერთაშორისო საზოგადოებას: „გლობალურმა საზოგადოებამ დაუყოვნებლივ უნდა დაასრულოს ისრაელის უკანონო ქმედებები, რომლებიც საფრთხეს უქმნის რეგიონულ და გლობალურ სტაბილურობას. ნეთანიაჰუს და ხოცვა-ჟლეტის ბანდის თავდასხმები, რომლებიც რეგიონს ცეცხლს უკიდებენ, დაუყოვნებლივ უნდა შეწყდეს."
პრეზიდენტმა კიდევ ერთხელ გაუსვა ხაზი ახლო აღმოსავლეთში ესკალაციის წინააღმდეგ თურქეთის პოზიციას და განაცხადა: "კიდევ ერთხელ ვაცხადებთ; ჩვენ არ გვინდა მეტი სისხლისღვრა, ნგრევა და კონფლიქტი ახლო აღმოსავლეთში".
ერდოღანმა განცხადება შემდეგნაირად დაასრულა: "ჩვენ, თურქეთის სახელით ვგმობთ ჩვენი მეზობელი ირანის წინააღმდეგ განხორციელებულ ვერაგულ თავდასხმებს; ვუსამძიმრებთ დაღუპულთა ოჯახებს, დაშავებულებს ვუსურვებთ სწრაფ გამოჯანმრთელებას და სამძიმარს ვუცხადებთ მეგობარ და მოძმე ირანელ ხალხს."
