გაერო: აშშ-ის ინტერვენციამ ვენესუელაში საერთაშორისო სამართალი შელახა

გაერთიანებულმა ერების ორგანიზაციამ ღრმა შეშფოთება გამოხატა აშშ-ის დრამატული ინტერვენციის გამო ვენესუელაში და აღნიშნა, რომ ეს აშკარად „ლახავს“ საერთაშორისო სამართლის ფუნდამენტურ პრინციპს.

გაეროს ადამიანის უფლებათა ოფისის პრესსპიკერმა, რავინა შამდასანიმ, სამშაბათს ჟენევაში ჟურნალისტებს განუცხადა: „არცერთმა სახელმწიფომ არ უნდა შეუქმნას საფრთხე სხვა სახელმწიფოს ტერიტორიულ მთლიანობას ან პოლიტიკურ დამოუკიდებლობას და არ უნდა გამოიყენოს ძალა“.

ეს განცხადება მოჰყვა შაბათს გამთენიისას აშშ-ის სპეცრაზმელების მიერ ვენესუელის პრეზიდენტის, ნიკოლას მადუროსა და მისი მეუღლის, სილია ფლორესის გატაცებას, რასაც თან ახლდა საჰაერო დარტყმები მოიერიშე თვითმფრინავების მხარდაჭერითა და საზღვაო ძალების ინტენსიური მობილიზება.

შამდასანიმ უარყო ვენესუელის მთავრობის მხრიდან „ადამიანის უფლებების ხანგრძლივი და საშინელი დარღვევების“ შესახებ არგუმენტი, რომელიც რეიდის გამამართლებელ საბუთად იქნა წარმოდგენილი.

გაეროს პრესსპიკერმა ხაზგასმით აღნიშნა: „ადამიანის უფლებების დარღვევისთვის პასუხისმგებლობის დაკისრება ვერ მოხდება ცალმხრივი სამხედრო ინტერვენციით, რომელიც საერთაშორისო სამართალს არღვევს“.

ადამიანის უფლებათა ოფისის პრესსპიკერმა რავინა შამდასანიმ აღნიშნა, რომ მათი უწყება უკვე ათი წელია წარადგენს თანმიმდევრულ ანგარიშებს ვენესუელაში მდგომარეობის „უწყვეტი გაუარესების“ შესახებ და დასძინა: „ჩვენ შეშფოთებულნი ვართ, რომ აშშ-ის ინტერვენციით გამოწვეული ამჟამინდელი დესტაბილიზაცია და ქვეყნის შემდგომი მილიტარიზაცია სიტუაციას კიდევ უფრო დაამძიმებს“.