აშშ-ის ელჩმა თურქეთში და სირიის საკითხებში სპეციალურმა წარმომადგენელმა ტომ ბარაკმა, „The Jerusalem Post“-ის ვაშინგტონის კონფერენციაზე სიტყვით გამოსვლისას განაცხადა, რომ თურქეთი უნდა ჩაერთოს ღაზისთვის შეთავაზებულ საერთაშორისო სტაბილიზაციის ძალებში. ამის მიზეზად მან თურქეთის სამხედრო პოტენციალი და პალესტინურ დაჯგუფება „ჰამასთან“ არსებული სადიალოგო არხები დაასახელა.

ხუთშაბათს, ისრაელელი ჟურნალისტის, ამიჩაი შტაინის მიერ სოციალურ ქსელ X-ში გავრცელებულ განცხადებებში ბარაკმა აღნიშნა, რომ თურქეთის მონაწილეობა გააძლიერებს საერთაშორისო სტაბილიზაციის ძალებს (ISF), რომელიც ცეცხლის შეწყვეტის გეგმის ფარგლებში შემუშავებული ომის შემდგომი მექანიზმის ერთ-ერთი ელემენტია.

ბარაკმა განაცხადა: „ჩვენი წინადადება ასეთი იყო: თურქებს, რომლებსაც რეგიონში ყველაზე დიდი და ეფექტური სახმელეთო ძალები ჰყავთ და „ჰამასთან“ დიალოგს აწარმოებენ, შესაძლოა ეს პოზიცია დაძაბულობის შესამცირებლად გამოეყენებინათ“.

ცეცხლის შეწყვეტის შეთანხმება, რომელიც აშშ-ის პრეზიდენტ დონალდ ტრამპის გეგმის ფარგლებში ამოქმედდა, ღაზაში ძალაში 10 ოქტომბერს შევიდა. ამან შეაჩერა ისრაელის ორწლიანი თავდასხმები, რომლებმაც 2023 წლის ოქტომბრიდან მოყოლებული 70 000-ზე მეტი ადამიანის სიცოცხლე იმსხვერპლა (მათ შორის უმრავლესობა ქალები და ბავშვებია), ხოლო დაახლოებით 171 000 ადამიანი დაშავდა.

შეთანხმების პირველი ეტაპი ითვალისწინებს ისრაელელი მძევლების გაცვლას თელ-ავივის მიერ დაკავებულ პალესტინელებზე. გეგმა ასევე მოიცავს ღაზის აღდგენასა და მართვის ისეთი ახალი მექანიზმის შექმნას, რომელშიც „ჰამასი“ არ იქნება ჩართული.

„წამყვანი როლი“

გაეროს N2803 რეზოლუციამ შექმნა ღაზის გარდამავალი პროცესის ჩარჩო, რომელიც ითვალისწინებს სამშვიდობო საბჭოს, საერთაშორისო სტაბილიზაციის ძალებისა (ISF) და რეგიონისთვის ახალი ადმინისტრაციული კომიტეტის შექმნას.

თურქეთმა აღნიშნულ ძალებში მონაწილეობისთვის მზადყოფნა გამოთქვა.

საგარეო საქმეთა მინისტრმა ჰაქან ფიდანმა გასულ კვირას განაცხადა, რომ ანკარა მზადაა, სამშვიდობო პროცესის მხარდასაჭერად „გააკეთოს ყველაფერი, რაც საჭიროა“. დოჰას ფორუმზე სიტყვით გამოსვლისას ფიდანმა აღნიშნა, რომ ბევრ ქვეყანას სურს თურქეთის ამ პროცესში ჩართვა. მისი თქმით, თურქეთს შეუძლია „წამყვანი როლი შეასრულოს“ და მისიას უფრო ფართო საზოგადოებრივი ლეგიტიმაცია შესძინოს. ფიდანმა განაცხადა, რომ ომის შემდგომი ღაზის მოწყობის საკითხებზე ანკარა კოორდინაციაშია ინდონეზიასთან, აზერბაიჯანთან და სხვა მუსლიმურ თუ არაბულ პარტნიორებთან.

ფიდანმა ხაზგასმით აღნიშნა, რომ თურქეთი ღიაა ჯარების გაგზავნისთვის, თუმცა დაამატა, რომ მონაწილეობა დამოკიდებული იქნება ყველა შესაბამისი მხარის პოზიციასა და მიღწეულ კონსენსუსზე.