ირანის საგარეო საქმეთა სამინისტრომ აშშ-ის პრეზიდენტ დონალდ ტრამპის განცხადების შემდეგ, თითქოს თეირანი აშშ-ზე დარტყმის განხორციელებისუნარიან რაკეტებს ქმნის, ვაშინგტონის ბრალდებებს სარაკეტო პროგრამის შესახებ „დიდი ტყუილები“ უწოდა.
საგარეო საქმეთა სამინისტროს სპიკერმა ისმაილ ბექაიმ ოთხშაბათს X-ზე დაწერა: „ყველაფერი, რასაც ისინი ირანის ბირთვულ პროგრამაზე, ბალისტიკურ რაკეტებსა და იანვრის არეულობისას დაღუპულთა რაოდენობაზე ამტკიცებენ, უბრალოდ ’დიდი ტყუილების’ გამეორებაა“.
მიუხედავად იმისა, რომ ბექაის ზუსტად არ დაუკონკრეტებია, რომელ ბრალდებებს პასუხობდა, მისი განცხადება რამდენიმე საათით ადრე ტრამპის მიერ გაჟღერებულ იმ მტკიცებას მოჰყვა, რომ ირანი ცდილობს შექმნას რაკეტები, რომლებსაც ამერიკის ტერიტორიამდე მიღწევა შეუძლიათ.
ირანის საგარეო საქმეთა მინისტრმა აბას არაღჩიმ ამ თვეში „ალ-ჯაზირასთან“ ინტერვიუში განაცხადა, რომ თეირანს არ აქვს აშშ-ზე თავდასხმის შესაძლებლობა, თუმცა ვაშინგტონის მხრიდან თავდასხმის შემთხვევაში, ის ახლო აღმოსავლეთში ამერიკულ ბაზებს დაარტყამს.
ყოველწლიურ მიმართვაში „ქვეყნის მდგომარეობის შესახებ“ (State of the Union), ტრამპმა კიდევ ერთხელ აღნიშნა, რომ ირანს ბირთვული იარაღის წარმოების უფლება არასოდეს მიეცემა და განაცხადა, რომ თეირანის ადმინისტრაცია „ამჟამად კვლავ თავის ბნელ ბირთვულ ზრახვებს მიჰყვება“.
„ტერორისტული აქტები“
ირანმა არაერთხელ უარყო ბრალდებები ბირთვული იარაღის შექმნის მცდელობის შესახებ, თუმცა ამტკიცებს, რომ ბირთვული ტექნოლოგიის მშვიდობიანი მიზნებისთვის გამოყენების უფლება ხელშეუხებელია.
აშშ-ის პრეზიდენტმა ასევე განაცხადა, რომ ირანის ძალებმა დეკემბერში დაწყებული და 8-9 იანვარს პიკს მიღწეული საპროტესტო ტალღის დროს 32 000 ადამიანი მოკლეს.
ირანელი ოფიციალური პირები აღიარებენ 3 000-ზე მეტ გარდაცვალებას, თუმცა აცხადებენ, რომ ძალადობა აშშ-ისა და ისრაელის მიერ წაქეზებული „ტერორისტული აქტების“ გამო მოხდა.
ტრამპის განცხადებები მოჰყვა ომანის შუამავლობით ბირთვულ პროგრამაზე გამართულ ორმხრივ მოლაპარაკებებს, რომელთა მესამე რაუნდიც ხუთშაბათს არის დაგეგმილი.
ვაშინგტონმა არაერთხელ მოითხოვა ირანისგან ურანის გამდიდრების სრული შეწყვეტა, თუმცა მას ასევე სურდა მოლაპარაკებების ფარგლებში ირანის ბალისტიკური რაკეტების პროგრამისა და რეგიონში არსებული შეიარაღებული დაჯგუფებების მხარდაჭერის საკითხების განხილვა, რაზეც ირანმა უარი განაცხადა.
შეთანხმების მისაღწევად ირანზე ზეწოლის გაზრდის მიზნით, ტრამპმა ახლო აღმოსავლეთში მნიშვნელოვანი სამხედრო-საზღვაო ძალები განათავსა.
