ფიფას პრეზიდენტმა ჯანი ინფანტინომ განაცხადა, რომ ირანი 2026 წლის მსოფლიო ჩემპიონატში „ნამდვილად“ მიიღებს მონაწილეობას, მიუხედავად იმისა, რომ აშშ-სა და ისრაელის ომი თეირანის წინააღმდეგ გრძელდება.
CNBC-სთვის მიცემულ ინტერვიუში ინფანტინომ აღნიშნა, რომ ირანის საფეხბურთო ნაკრები მსოფლიო ჩემპიონატზე აუცილებლად გამოვა. „ვიმედოვნებთ, რომ იმ დროისთვის ვითარება მშვიდობიანი გახდება, რაც პროცესზე დადებით გავლენას მოახდენს“, - განაცხადა მან.
ივნისში აშშ-ში დაგეგმილ მატჩებთან დაკავშირებით მან თქვა: „ირანი უნდა ჩამოვიდეს; ისინი საკუთარ ხალხს წარმოადგენენ, მათ მონაწილეობის უფლება მოიპოვეს და ფეხბურთელებს თამაში სურთ“.
„სპორტი პოლიტიკის მიღმა უნდა იყოს. თუ არავინ სხვა არ არსებობს, ვისაც ხიდების გაბმისა და მათი შენარჩუნების სჯერა, ჩვენ ვაკეთებთ ამ საქმეს“, - დასძინა ინფანტინომ.
ეს განცხადება მოჰყვა მექსიკის დასტურს იმის შესახებ, რომ მან უარყო ფიფას თხოვნა ირანის ყველა მატჩის აშშ-ის სამხრეთ მეზობელთან გადატანის თაობაზე.
ირანის მონაწილეობა მსოფლიო ჩემპიონატზე კითხვის ნიშნის ქვეშ დადგა 28 თებერვალს აშშ-სა და ისრაელთან დაწყებული ომის გამო.
ირანმა 2026 წლის ფიფას მსოფლიო ჩემპიონატის საგზური 2025 წლის მარტში, უზბეკეთთან ფრედ (2-2) თამაშის შემდეგ მოიპოვა.
მსოფლიო ჩემპიონატი, რომელსაც აშშ, მექსიკა და კანადა ერთობლივად უმასპინძლებენ, 11 ივნისს იწყება.
ამის მიუხედავად, ირანის ყველა მატჩი G ჯგუფში - მათ შორის ბელგიასთან, ეგვიპტესთან და ახალ ზელანდიასთან შეხვედრები - აშშ-ში ჩატარდება.
ფიფას ვებგვერდზე გამოქვეყნებული განრიგის მიხედვით, ირანი 15 ივნისს ლოს-ანჯელესის სტადიონზე ახალ ზელანდიას შეხვდება, 21 ივნისს იმავე არენაზე ბელგიას დაუპირისპირდება, ხოლო 26 ივნისს სიეტლის სტადიონზე - ეგვიპტეს.
