პაპმა ლეო XIV-მ აღნიშნა, რომ ახლო აღმოსავლეთში არსებული ყველა სირთულის მიუხედავად, ერთიანობა, პარტნიორობა, შერიგება და მშვიდობა შესაძლებელია.
პაპმა ეს განცხადებები ორშაბათს, ბეირუთის ცენტრში გამართულ შეხვედრაზე გააკეთა, რომელსაც 300-ზე მეტი რელიგიური ლიდერი და ლიბანის ქრისტიანული და ისლამური კონფესიების წარმომადგენლები ესწრებოდნენ, ხოლო ღონისძიება მუსიკალურად გააფორმეს „Sistema Beirut Chants“-ის გუნდმა, ისლამური ობოლთა თავშესაფრის გუნდმა და იმამ სადრის ფონდის მუსიკალურმა ჯგუფმა.
„თქვენ მოწოდებულნი ხართ, იყოთ მშვიდობის მშენებლები: დაუპირისპირდეთ შეუწყნარებლობას, დაძლიოთ ძალადობა, აღმოფხვრათ გარიყვა და გაანათოთ სამართლიანობისკენ მიმავალი გზა“, - განაცხადა პაპმა.
„იმ ეპოქაში, როცა თანაცხოვრება შორეულ ოცნებად გვეჩვენება, სხვადასხვა რელიგიის აღმსარებელი ლიბანელი ხალხი მკაფიოდ გვახსენებს, რომ შიშს, უნდობლობასა და წინასწარგანწყობებს გადამწყვეტი სიტყვა არ ეთქმით; რომ ერთიანობა, შერიგება და მშვიდობა შესაძლებელია,“ - დასძინა მან.
შეხვედრა სირიელ კათოლიკეთა პატრიარქის, იგნატიუს ჯოზეფ III იუნანის ოფიციალური გახსნითი სიტყვით დაიწყო; ამას მოჰყვა ბიზანტიური წესით სახარებიდან ნაწყვეტის წაკითხვა და ყურანის კითხვა.
ქრისტიანი სასულიერო პირების გამოსვლების შემდეგ, ლიბანის მუფთიმ, შეიხ აბდულატიფ დერიანმა პაპს მიესალმა და ხაზი გაუსვა, რომ ლიბანი არის „გზავნილის მქონე ქვეყანა, ამ გზავნილის მატარებელი და მსოფლიოში მშვიდობისა და უსაფრთხოების მცველი“.
უმაღლესი ისლამური შიიტური საბჭოს ვიცე-პრეზიდენტმა, შეიხ ალი ელ-ხატიბმა კი განაცხადა: „ჩვენ არ გვიყვარს იარაღის ტარება და ლიბანის ბედს თქვენს ხელში ვტოვებთ; ვიმედოვნებთ, რომ მსოფლიო ჩვენს ქვეყანას გამოსავლის პოვნაში დაეხმარება“.
რელიგიური მრავალფეროვნება
ღონისძიების დაწყებამდე, ხალხი შეიკრიბა გზის იმ მონაკვეთზე, რომელიც ჩრდილოეთ ბეირუთში მდებარე სამოციქულო ნუნციატურას ქალაქის ცენტრში არსებულ მოწამეთა მოედანთან აკავშირებს, რათა პაპ ლეო XIV-ის ოფიციალურ კორტეჟს მისალმებოდნენ.
კვირას პაპი ლეო XIV სამდღიანი ვიზიტით ლიბანში ჩავიდა; იგი ქვეყანას თურქეთიდან ეწვია, სადაც ასევე სამი დღე დაყო.
ლიბანის რელიგიური მრავალფეროვნება მის პოლიტიკურ სისტემაშიც აისახება. პრეზიდენტი აუცილებლად მარონიტი ქრისტიანი, პრემიერ-მინისტრი - სუნიტი მუსლიმი, ხოლო პარლამენტის თავმჯდომარე შიიტი მუსლიმი უნდა იყოს.
