დონალდ ტრამპმა დაადასტურა, რომ სანქციების დაწესების ბოლო ვადამდე, სპეციალურ ელჩს, სტივ ვიტკოფს, მომავალ კვირას რუსეთში გააგზავნის.

კვირას, ჟურნალისტებთან საუბრისას, ტრამპმა განაცხადა, რომ დიმიტრი მედვედევთან ონლაინ კამათის შემდეგ, "რეგიონში" ორი ბირთვული წყალქვეშა გემი გაგზავნა. თუმცა, არ დაუკონკრეტებია, აღნიშნული წყალქვეშა გემები ბირთვული ენერგიით არიან აღჭურვილნი თუ ბირთვული იარაღით, რადგან აშშ-ის არმია მათი განლაგების ადგილებს საიდუმლოდ ინახავს.

ეს ბირთვული მუქარა მას შემდეგ გაჩნდა, რაც ტრამპმა რუსეთს უკრაინაში ომის დასრულების ნაბიჯების გადადგმის ვადა მომდევნო კვირის ბოლომდე მისცა, წინააღმდეგ შემთხვევაში ახალი სანქციები დაეკისრება.

რესპუბლიკელმა ლიდერმა ვიტკოფის ვიზიტთან დაკავშირებით განაცხადა: "ვფიქრობ, მომავალ კვირას, ოთხშაბათს ან ხუთშაბათს". რუსეთის პრეზიდენტი ვლადიმერ პუტინი ვიტკოფს მოსკოვში არაერთხელ შეხვდა, სანამ ტრამპის მცდელობები კრემლთან ურთიერთობის დათბობისკენ ჩიხში შევიდოდა.

ჟურნალისტების კითხვაზე, თუ რა გზავნილს გადასცემს ვიტკოფი მოსკოვს და რა უნდა გააკეთოს რუსეთმა სანქციების თავიდან ასაცილებლად, ტრამპმა უპასუხა: "დიახ, დადეთ შეთანხმება, რომლის მიხედვითაც ხალხს აღარ მოკლავენ".

"მეორადი გადასახადები"

ტრამპმა მანამდე თქვა, რომ ახალი ზომები შესაძლოა გულისხმობდეს "მეორად გადასახადებს", რომლებიც მიმართულია რუსეთის სავაჭრო პარტნიორების წინააღმდეგ, როგორიცაა ჩინეთი და ინდოეთი. ამან შესაძლოა რუსეთი კიდევ უფრო რთულ მდგომარეობაში ჩააგდოს, თუმცა საერთაშორისო ასპარეზზე სერიოზული უკმაყოფილება გამოიწვიოს.

ვაშინგტონიდან განხორციელებული ზეწოლის მიუხედავად, რუსეთი დასავლური ორიენტაციის მქონე მეზობელზე თავდასხმებს აგრძელებს. პუტინმა პარასკევს განაცხადა, რომ მას მშვიდობა სურს, თუმცა მისი მოთხოვნები ომის დასასრულებლად "უცვლელია", რომელიც სამ წელზე მეტია გრძელდება.

"ჩვენ გვჭირდება მყარი და სტაბილური მშვიდობა, რომელიც უზრუნველყოფს რუსეთისა და უკრაინის უსაფრთხოებას და დააკმაყოფილებს ორივე მხარეს", - განაცხადა პუტინმა და დასძინა: "თუმცა, [რუსეთის] პირობები აბსოლუტურად იგივე რჩება".

რუსეთი ხშირად ითხოვს, რომ უკრაინამ უარი თქვას ნატოში გაწევრიანების გეგმებზე და მოსკოვის მიერ ანექსირებული ოთხი რეგიონის კონტროლი გადასცეს. კიევი კი ამ მოთხოვნებს მიუღებლად მიიჩნევს.

კვირას, უკრაინამ უპილოტო თვითმფრინავით შეუტია სოჭში მდებარე ნავთობის საცავს, რამაც ხანძარი გამოიწვია. კიევმა განაცხადა, რომ გააძლიერებს საჰაერო თავდასხმებს, რუსეთის მხრიდან საკუთარ ტერიტორიაზე თავდასხმების გახშირების საპასუხოდ. თავდასხმების შედეგად ათობით მშვიდობიანი მოქალაქე დაიღუპა.

ორშაბათს, რუსეთის თავდაცვის სამინისტრომ განაცხადა, რომ საჰაერო თავდაცვის სისტემებმა ღამით 61 უკრაინული უპილოტო საფრენი აპარატი ჩამოაგდო. უკრაინის სამხედრო ადმინისტრაციამ კი ორშაბათს დილით Telegram-ზე განაცხადა, რომ ხერსონის ოლქში რუსულ დაბომბვას ერთი ადამიანი ემსხვერპლა.

უკრაინის პრეზიდენტმა ვოლოდიმირ ზელენსკიმ კვირას განაცხადა, რომ ტყვეების გაცვლისთვის მზადება მიმდინარეობს, რომლის შედეგადაც 1200 უკრაინელი სამხედრო მოსამსახურე სახლში დაბრუნდება. მოლაპარაკებები რუსეთთან ივლისში სტამბოლში გაიმართა.

ტრამპმა საპრეზიდენტო მეორე ვადა უკრაინაში ომის დასრულების იმედით დაიწყო, რომელიც რუსეთის მიერ 2022 წლის თებერვალში მეზობლის წინააღმდეგ სამხედრო ოპერაციის დაწყების შემდეგ მიმდინარეობს.

თუმცა, ბოლო კვირების განმავლობაში ტრამპი სულ უფრო მეტ იმედგაცრუებას გამოთქვამს პუტინის მიმართ მოსკოვის შეუჩერებელი თავდასხმების გამო.