ევროკავშირის თავდაცვისა და კოსმოსის საკითხებში კომისარმა ანდრიუს კუბილიუსმა აღნიშნა, რომ აშშ-ს არ აქვს შესაძლებლობა, სპარსეთის ყურის ქვეყნებსა და უკრაინას თავდაცვისთვის საკმარისი რაოდენობის რაკეტები მიაწოდოს.
პარასკევს გაკეთებულ განცხადებაში კუბილიუსმა აღნიშნა: „სრულიად ნათელია, რომ ირანის კრიზისის შემდეგ - თუკი მას ასე ვუწოდებთ - ევროპაში საჰაერო და სარაკეტო თავდაცვის სისტემების წარმოების გაზრდა ჩვენთვის კიდევ უფრო აქტუალური გახდა. რადგან ამერიკელები, პირდაპირი მნიშვნელობით, ვერ შეძლებენ საკმარისი რაოდენობის რაკეტების მიწოდებას სპარსეთის ყურის ქვეყნების, ამერიკული არმიისა და უკრაინის საჭიროებებისთვის“.
კუბილიუსმა განაცხადა, რომ ევროპა სარაკეტო თავდაცვის განვითარების კუთხით „დიდი გამოწვევის“ წინაშე დგას.
ეს გაფრთხილება გაჟღერდა იმ ფონზე, როდესაც უკრაინა კვლავ რუსული სარაკეტო თავდასხმების ქვეშაა, ხოლო სპარსეთის ყურის ქვეყნები სტრატეგიულ ინფრასტრუქტურაზე ირანის განმეორებითი იერიშების შემდეგ მაღალი მზადყოფნის რეჟიმში იმყოფებიან.
შეშფოთებას კიდევ უფრო ამწვავებს თავად აშშ-ში რაკეტების დეფიციტი.
ვრცელდება ინფორმაცია, რომ ირანზე აშშ-ისრაელის მიმდინარე შეტევის ფონზე, აშშ-ს ძირითადი რაკეტების, მათ შორის Tomahawk-ის ტიპის ფრთოსანი რაკეტებისა და SM-3 ტიპის რაკეტსაწინააღმდეგო საშუალებების მარაგების დეფიციტი აქვს.
აშშ-ის მაღალჩინოსანმა აღნიშნა, რომ ვაშინგტონი მომდევნო 24 საათის განმავლობაში თავდასხმების „მნიშვნელოვან ზრდას“ ელოდება, მაშინ როდესაც რაკეტებისა და რაკეტსაწინააღმდეგო სისტემების რეზერვები კლებას განაგრძობს.
პენტაგონს ასევე აქვს პრობლემები Patriot-ის სისტემის რაკეტების შეზღუდულ რაოდენობასთან დაკავშირებით, რადგან რუსეთთან ოთხწლიანი ომის განმავლობაში უკრაინის საჰაერო თავდაცვის სისტემებმა ამ მარაგების მნიშვნელოვანი ნაწილი ამოწურა.
