ერდოღანის გაფრთხილება: „შავ ზღვაში კომერციულ გემებზე თავდასხმები არავის არგებს“

პრეზიდენტმა რეჯეფ თაიფ ერდოღანმა, რუსეთ-უკრაინის ომთან დაკავშირებულ ბოლო თავდასხმებზე მითითებით, გააკეთა გაფრთხილება, რომ შავ ზღვაში კომერციული და სამოქალაქო გემების მიზანში ამოღება არავის სასიკეთოდ არ წაადგება.

სამშაბათს, ანკარაში გამართულ ელჩების მე-16 კონფერენციაზე სიტყვით გამოსვლისას, ერდოღანმა აღნიშნა, რომ ეს თავდასხმები საფრთხეს უქმნის ნავიგაციის უსაფრთხოებას შავ ზღვაში და ანკარამ ამ საკითხზე თავისი გაფრთხილებები ორივე მხარეს (რუსეთსა და უკრაინას) გადასცა.

თურქეთმა მანამდეც განაცხადა, რომ მის განსაკუთრებულ ეკონომიკურ ზონაში გემებზე თავდასხმები მიუღებელია.

ერდოღანმა ხაზგასმით აღნიშნა, რომ თურქეთს „ძლიერად ყოფნის გარდა სხვა არჩევანი არ აქვს“, რათა დაიცვას საკუთარი ინტერესები და „დახმარების ხელი გაუწოდოს მოძმეებს“.

ჰუმანიტარული დახმარება ღაზას და ისრაელის პოლიტიკა სირიაში

კრიზისულ რეგიონებში თურქეთის ჰუმანიტარულ და დიპლომატიურ ნაბიჯებზე საუბრისას, ერდოღანმა აღნიშნა, რომ ანკარამ, ყველა შეზღუდვის მიუხედავად, ღაზაში 103 ათას ტონაზე მეტი ჰუმანიტარული დახმარების ჩატანით მნიშვნელოვანი საქმე გააკეთა. „ღაზაში მრავალი დედა, მეუღლე და შვილი ეძებს თავის დედას, მამას, ცხოვრების თანამგზავრს, ან ელოდება რაიმე ცნობას მათი ბედის შესახებ“, - განაცხადა ერდოღანმა.

ახალი პერიოდი სირიაში და უკან დაბრუნების პროცესი

თელ-ავივის მიერ სირიის მიმართ განხორციელებულ აგრესიულ ქმედებებზე საუბრისას, ერდოღანმა აღნიშნა, რომ ომით დაღლილ ქვეყანაში, სადაც ბაშარ ასადის დამხობის შემდეგ, ერთი წლის წინ ხელისუფლებაში ახალი ადმინისტრაცია მოვიდა, ისრაელი ამჟამად წარმოადგენს ყველაზე დიდ დაბრკოლებას მყარი უსაფრთხოებისა და სტაბილურობის გზაზე. პრეზიდენტმა განაცხადა, რომ თურქეთიდან სამშობლოში დაბრუნებული სირიელი ლტოლვილების რიცხვმა 580 ათასს მიაღწია და დასძინა, რომ სტაბილურობის უზრუნველყოფასთან ერთად, ნებაყოფლობითი და ღირსეული დაბრუნების მაჩვენებელი გაიზრდება.

გაფრთხილება SDF/YPG-ს შესახებ და სამხრეთ კავკასიის დიპლომატია

ერდოღანმა შეახსენა აუდიტორიას, რომ ანკარა ითხოვს სირიაში ტერორისტული ორგანიზაცია YPG-ის კონტროლის ქვეშ მყოფ SDG-სთან (სირიის დემოკრატიული ძალები) დადებული 10 მარტის შეთანხმების აღსასრულებლად საჭირო ნაბიჯების გადადგმას და გააკეთა გაფრთხილება: „წინააღმდეგობის გაწევის შემთხვევაში, არსებობს რისკი, რომ ეს ვითარება კრიზისში გადაიზარდოს“.

სამხრეთ კავკასიაში მიმდინარე მოვლენებზე საუბრისას, ერდოღანმა აღნიშნა, რომ ანკარა დიალოგის რეჟიმშია ბაქოსთან, ხოლო ერევანთან ნორმალიზაციის პროცესს ავითარებს. ერდოღანის თქმით, როგორც სომხეთი, ისე აზერბაიჯანი ახლოს არიან სამშვიდობო შეთანხმების ხელმოწერასთან.