აშშ-ის ცენტრალურმა სარდლობამ დაადასტურა, რომ მას შემდეგ, რაც ირანმა ჰორმუზის სრუტესთან სავაჭრო გემზე მორიგი იერიში მიიტანა, ამერიკულმა ძალებმა ირანში მრავალი სამიზნე კვლავ დაბომბეს.
CENTCOM-ის მიერ შაბათს გაკეთებულ განცხადებაში ნათქვამია, რომ თავდასხმები აშშ-ის პრეზიდენტის მითითებით 27 ივნისს განხორციელდა.
განცხადების თანახმად, ირანულმა ძალებმა პანამის დროშის ქვეშ მცურავ ტანკერ Kiku-ს ერთჯერადი გამოყენების (ე.წ. „კამიკაძე“) დრონით დაესხნენ თავს. ტანკერი, რომელსაც ორ მილიონ ბარელზე მეტი ნედლი ნავთობი გადაჰქონდა, პარასკევს, აშშ-ის აღმოსავლეთის დროით 04:30 საათზე, ჰორმუზის სრუტესთან გავლისას დაიბომბა.
„ამერიკულმა ძალებმა დღეს ჩაატარეს ოპერაციები, როგორც პირდაპირი პასუხი ირანის მიერ სავაჭრო გემებზე განხორციელებულ უწყვეტ თავდასხმებზე“, - ნათქვამია CENTCOM-ის განცხადებაში.
გავრცელებული ინფორმაციით, აშშ-ის სამხედრო თვითმფრინავების სამიზნე გახდა ირანის სამხედრო სათვალთვალო ინფრასტრუქტურა, საკომუნიკაციო სისტემები, საჰაერო თავდაცვის პუნქტები, უპილოტო საფრენი აპარატების შესანახი ობიექტები და საზღვაო ნაღმების დაგების შესაძლებლობები.
სარდლობამ აღნიშნა, რომ სავაჭრო გემების მიმოსვლა ჰორმუზის სრუტეში გრძელდება და ამერიკული ძალები არიან „ფხიზლად, ეფექტურად და მზადყოფნაში“.
აფეთქებების ხმა ირანის სამხრეთში
ირანის სახელმწიფო ტელევიზიის ცნობით, კვირას, გამთენიისას, ქვეყნის სამხრეთით მდებარე ქალაქ სირიკში მრავალი აფეთქების ხმა გაისმა.
სამხედრო წყაროზე დაყრდნობით გავრცელებულ ინფორმაციაში აღნიშნულია, რომ ზოგიერთი ჭურვი სოფელ თაჰრუიში მდებარე სატელეკომუნიკაციო კოშკს მოხვდა.
ირანულმა საინფორმაციო სააგენტო Fars-მა ასევე გაავრცელა ინფორმაცია აფეთქების შესახებ ქვეყნის სამხრეთში, კუნძულ ყეშმზე მდებარე სოფელ მისინში.
შესაძლო მსხვერპლის ან დაშავებულების შესახებ ინფორმაცია ამ დროისთვის არ გავრცელებულა.
