თურქეთის რესპუბლიკის საგარეო საქმეთა მინისტრმა ჰაქან ფიდანმა განაცხადა, რომ აშშ-სა და ირანს შორის მოლაპარაკებები ამჟამად შეჩერებულია, თუმცა მას სჯერა, რომ თეირანი შესაძლოა ღია იყოს არაფორმალური დიპლომატიური არხებისთვის.
ფიდანმა აღნიშნა, რომ რეგიონში არსებული კონფლიქტური გარემო ოფიციალური დიპლომატიის წარმოებას ართულებს.
შაბათს Associated Press-თან საუბრისას ფიდანმა თქვა: „ამჟამინდელი პირობები დიპლომატიისთვის დიდად ხელსაყრელი არ არის“ და დასძინა, რომ ირანელები თავს „ღალატის მსხვერპლად გრძნობენ“, რადგან მათ თავს ვაშინგტონთან ბირთვული მოლაპარაკებების წარმოებისას დაესხნენ.
„ვფიქრობ, ისინი ნებისმიერი გონივრული უკანა კარის დიპლომატიისთვის ღია არიან“, — განაცხადა ფიდანმა.
საგარეო საქმეთა მინისტრმა ასევე ხაზგასმით აღნიშნა, რომ რეგიონში დაძაბულობის ზრდასთან ერთად თურქეთის პრიორიტეტი კონფლიქტის მიღმა დარჩენაა.
„ვიცი, რომ პროვოცირებას გვიკეთებენ და კვლავაც გაგვიკეთებენ, თუმცა ჩვენი მიზანი სწორედ ესაა“, — თქვა ფიდანმა, — „ჩვენ ამ ომის მიღმა დარჩენა გვსურს“.
ნეთანიაჰუს ლიდერობით ისრაელს თავისი დღის წესრიგის გასატარებლად „მტერი სჭირდება“
ფიდანმა ასევე გააკრიტიკა ისრაელის პოლიტიკა რეგიონში და აღნიშნა, რომ პრემიერ-მინისტრ ბენიამინ ნეთანიაჰუს ადმინისტრაციის პირობებში ისრაელი რეგიონულ აქტორებს მუდმივად საფრთხედ წარმოაჩენს.
საგარეო საქმეთა მინისტრმა ფიდანმა თქვა: „სანამ ნეთანიაჰუ იქნება, (ისრაელი) ყოველთვის ვინმეს მტრად გამოაცხადებს“.
„რადგან საკუთარი დღის წესრიგის წინ წასაწევად ეს სჭირდებათ. თუ თურქეთი არ იქნება, რეგიონიდან სხვა ქვეყანას ამოიღებენ მიზანში“.
ფიდანმა ისრაელი უსაფრთხოებაზე მეტად ტერიტორიული მიზნების დევნაში დაადანაშაულა.
„ის, რასაც ისინი ეძებენ, არა უსაფრთხოება, არამედ მეტი ტერიტორიაა“, — განაცხადა ფიდანმა, — „სანამ ამ იდეაზე უარს არ იტყვიან, ახლო აღმოსავლეთში ყოველთვის ომი იქნება“.
