ოთხშაბათს ნავთობის ფასებმა განაგრძო რამდენიმედღიანი ზრდა იმ ცნობების ფონზე, რომ აშშ აპირებს ირანის პორტების ბლოკადის გაგრძელებას. ეს, სავარაუდოდ, გამოიწვევს ახლო აღმოსავლეთიდან - ნავთობის მოპოვების უმნიშვნელოვანესი რეგიონიდან - მიწოდების შეფერხების გახანგრძლივებას.
როგორც გამოცემა Wall Street Journal სამშაბათს გვიან ღამით, ამერიკელ მაღალჩინოსნებზე დაყრდნობით იტყობინებოდა, აშშ-ის პრეზიდენტმა დონალდ ტრამპმა თანაშემწეებს ირანის ბლოკადის გაგრძელებისთვის მოსამზადებელი სამუშაოების დაწყება დაავალა.
გავრცელებული ინფორმაციით, ტრამპი გააგრძელებს ირანის ეკონომიკისა და ნავთობის ექსპორტის შევიწროებას პორტებში გემების მიმოსვლის დაბლოკვის გზით.
ივნისის ბრენტის მარკის ნავთობის ფიუჩერსები 52 ცენტით, ანუ 0,47%-ით გაიზარდა და ბარელზე 111,78 დოლარი შეადგინა, რითაც ზედიზედ მერვე დღეა ზრდას განაგრძობს. ივნისის კონტრაქტს ვადა ხუთშაბათს ეწურება, ხოლო უფრო აქტიური ივლისის ფიუჩერსები ამჟამად 0,4%-იანი მატებით, 104,84 დოლარად ივაჭრება.
აშშ-ის დასავლეთ ტექსასური ნავთობის (WTI) ივნისის ფიუჩერსები, წინა სესიაზე 3,7%-იანი მატების შემდეგ, კიდევ 57 ცენტით (0,57%-ით) გაიზარდა და ბარელზე 100,50 დოლარი შეადგინა. ფასები ბოლო რვა დღიდან შვიდში მზარდი იყო.
საბროკერო კომპანია Haitong Futures-ის ანალიტიკოსმა, იანგ ანმა აღნიშნა: „ნავთობის ფასების ბოლოდროინდელი ზრდა სრუტის ბლოკადითაა გამოწვეული. თუ ტრამპი ბლოკადის გაგრძელებას აპირებს, მიწოდების შეფერხებები კიდევ უფრო გაუარესდება, რაც ფასებს კიდევ უფრო მაღლა დასწევს“.
აშშ-ისრაელ-ირანის ომში, რომელიც 28 თებერვალს დაიწყო, ცეცხლის შეწყვეტა გამოცხადდა და მხარეები კონფლიქტის ოფიციალურად დასრულებას ცდილობენ. თუმცა, ირანმა ჰორმუზის სრუტეში, სადაც გლობალური ნავთობისა და გათხევადებული ბუნებრივი აირის მიწოდების დაახლოებით 20% გადის, გემების მოძრაობა შეაჩერა, აშშ-მა კი ირანის პორტების ბლოკადა მოახდინა. ამ ვითარებამ კონფლიქტი ჩიხში შეიყვანა.
აშშ ირანისგან ბირთვული იარაღის პროგრამის შეწყვეტას მოითხოვს, ირანი კი, თავის მხრივ, ბოლოდროინდელი შეტაკებების გამო კომპენსაციას, ეკონომიკური სანქციების შემსუბუქებასა და ჰორმუზის სრუტეზე გარკვეული კონტროლის დაწესებას ითხოვს.
ჰორმუზის სრუტის ჩაკეტვა კვლავ იწვევს გლობალური მარაგების შემცირებას. ბაზრის წყაროებმა სამშაბათს გვიან ღამით განაცხადეს, რომ ამერიკის ნავთობის ინსტიტუტის (API) მონაცემებით, აშშ-ის ნავთობის მარაგები ზედიზედ მეორე კვირაა მცირდება.
წყაროების ცნობით, 24 აპრილს დასრულებულ კვირაში ნედლი ნავთობის მარაგები 1,79 მილიონი ბარელით შემცირდა. ბენზინის მარაგებმა 8,47 მილიონი ბარელით იკლო, ხოლო დისტილირებული საწვავის მარაგებმა - 2,60 მილიონი ბარელით.
