ლეო XIV-მ, პაპის სტატუსით, პირველად აღავლინა საშობაო ღამის მესა
ამ შემთხვევასთან დაკავშირებით, პაპმა ლეო XIV-მ მატერიალიზმი გააკრიტიკა და გააჟღერა გზავნილი, რომელიც დამკვირვებლების მიერ ეკლესიის ძველ ტრადიციებთან დაბრუნებად შეფასდა.
რომის კათოლიკური ეკლესიის წინამძღოლმა, პაპმა ლეო XIV-მ, ოთხშაბათს თავის პირველ საშობაო ღამის მესას უხელმძღვანელა.
მესა, რომელიც ვატიკანში, წმინდა პეტრეს ბაზილიკაში გაიმართა, ესწრებოდნენ კარდინალები, ეპისკოპოსები, მღვდლები, ვატიკანში აკრედიტებული დიპლომატიური წარმომადგენლები და მრავალი მოწვეული სტუმარი.
კარდინალი რობერტ ფრენსის პრევო, პაპ ფრანცისკეს 21 აპრილს გარდაცვალების შემდეგ, 8 მაისს კათოლიკური ეკლესიის 267-ე პაპად აირჩიეს და მან ლეო XIV-ის სახელი მიიღო.
მესის დროს წარმოთქმულ სიტყვაში პაპმა ლეომ მატერიალიზმი გააკრიტიკა და აღნიშნა, რომ დამახინჯებული ეკონომიკა ადამიანებს მხოლოდ საქონლად (ნივთებად) განიხილავს.
მესის დაწყებამდე პაპმა წმინდა პეტრეს მოედანზე შეკრებილებს მიესალმა და შობა მიულოცა.
აღინიშნა, რომ თავისი წინამორბედისგან განსხვავებით, პაპმა ლეომ საშობაო მესა შედარებით გვიან, შუაღამესთან ახლოს დაიწყო და მსახურება უფრო ხანგრძლივი იყო. მედიაში გავრცელებულ ცნობებში ეს ძველ ტრადიციებთან დაბრუნებად შეფასდა.
ხუთშაბათს, საშობაო მესის შემდეგ, პაპი წმინდა პეტრეს ბაზილიკიდან ტრადიციული მიმართვით „Urbi et Orbi“ (ქალაქსა და სამყაროს) წარდგება. თავის მიმართვაში ლეო XIV გლობალურ საკითხებზე გაამახვილებს ყურადღებას.