ირანმა გაეროს აცნობა, რომ იმ შემთხვევაში, თუ მასზე სამხედრო თავდასხმა განხორციელდება, იგი ლეგიტიმურ სამიზნეებად მიიჩნევს იმ მხარის ბაზებს, ობიექტებსა და აქტივებს, რომელსაც რეგიონში „მტრულ ძალად“ თვლის.

ხუთშაბათს გაეროში ირანის მუდმივმა წარმომადგენლობამ წერილობით განცხადებაში აღნიშნა, რომ აშშ-ის პრეზიდენტ დონალდ ტრამპის განცხადებები „სამხედრო თავდასხმის რეალურ საფრთხეზე მიუთითებს“, თუმცა ხაზი გასვა, რომ ირანს ომი არ სურს. განცხადებაში ნათქვამია, რომ სამხედრო აგრესიის შემთხვევაში, ირანი „გადამწყვეტ“ პასუხს გასცემს.

ირანის ეს რეაქცია მოჰყვა ტრამპის გაფრთხილებას, რომ თეირანმა ვაშინგტონთან მიმდინარე მოლაპარაკებების ფარგლებში მომდევნო 10 დღის განმავლობაში „მნიშვნელოვანი შეთანხმება“ უნდა დადოს, წინააღმდეგ შემთხვევაში „ცუდი რამ მოხდება“. პარალელურად, ტრამპმა რეგიონში სამხედრო ხომალდები, გამანადგურებლები და სხვა სამხედრო აღჭურვილობა განათავსა.

ღაზის სტაბილიზაციისთვის შექმნილი „მშვიდობის საბჭოს“ გახსნით სხდომაზე ტრამპმა განაცხადა: „წლების განმავლობაში ვხედავდით, რომ ირანთან მნიშვნელოვანი შეთანხმების მიღწევა ადვილი არ არის. ჩვენ უნდა დავდოთ მნიშვნელოვანი ხელშეკრულება, წინააღმდეგ შემთხვევაში ცუდი რამ მოხდება“.

ტრამპმა გააფრთხილა, რომ შეთანხმების არარსებობის შემთხვევაში ვაშინგტონს „შესაძლოა ერთი ნაბიჯით წინ წასვლა მოუხდეს“ და დასძინა: „ამას, სავარაუდოდ, მომდევნო დაახლოებით 10 დღის განმავლობაში გავიგებთ“.

ტრამპის განცხადებები მოჰყვა ისრაელის პრემიერ-მინისტრ ნეთანიაჰუს გაფრთხილებასაც: „თუ აიათოლები შეცდომას დაუშვებენ და თავს დაგვესხმიან, ისინი მიიღებენ ისეთ პასუხს, როგორსაც ვერც კი წარმოიდგენენ“.

სამხედრო ძალების მობილიზება ირანზე თავდასხმისთვის

ეს გაფრთხილებები გაჟღერდა ჟენევაში ომანის შუამავლობით აშშ-სა და ირანს შორის გამართული მოლაპარაკებების მეორე რაუნდიდან რამდენიმე დღეში. აშშ ცდილობს ხელი შეუშალოს ირანს ბირთვული ბომბის შექმნაში, ირანი კი უარყოფს ასეთ განზრახვას და აშშ-ის სანქციებისგან გათავისუფლებას ითხოვს.

აშშ-მა რეგიონში სამხედრო ძალების, მათ შორის ავიამზიდების, გამანადგურებლებისა და საწვავით გამმართველების განთავსებით, საფუძველი მოუმზადა პოტენციურ თავდასხმას, თუკი ტრამპი შესაბამის ბრძანებას გასცემს. ვაშინგტონმა რეგიონში მეორე ავიამზიდის გაგზავნის ბრძანება გასცა; სატელიტური ფოტოების მიხედვით, პირველი მათგანი - USS Abraham Lincoln და მისი 80-მდე თვითმფრინავი - კვირა დღის მონაცემებით, ირანის სანაპიროდან დაახლოებით 700 კილომეტრში იმყოფებოდა.

ირანმა კვირის დასაწყისში საკუთარი სამხედრო ძალა ჰორმუზის სრუტეში „ისლამური რევოლუციის გუშაგთა კორპუსის“ წვრთნებით წარმოაჩინა. ირანელი პოლიტიკოსები არაერთხელ დაიმუქრნენ ამ სრუტის ჩაკეტვით, რომელიც ნავთობისა და გაზის გადაზიდვის უმნიშვნელოვანესი საერთაშორისო გზაა. აშშ-ირანის კონფლიქტის შიშმა ამ კვირაში ნავთობის ფასების ზრდა გამოიწვია.

ენერგეტიკის საერთაშორისო სააგენტოს მონაცემებით, ჰორმუზის სრუტეზე მოდის მსოფლიო საზღვაო ნავთობის გადაზიდვების მეოთხედი და თხევადი ბუნებრივი გაზის მეხუთედი.