ამერიკის შეერთებული შტატების პრეზიდენტმა დონალდ ტრამპმა კვირას, უკრაინის პრეზიდენტ ვოლოდიმირ ზელენსკისთან შეხვედრის შემდეგ განაცხადა, რომ რუსეთ-უკრაინის ომის დასრულებისკენ მნიშვნელოვანი პროგრესი იქნა მიღწეული.

„ჩვენ პროცესის 95% გავიარეთ. არ ვამბობ, რომ ზუსტად ამდენი პროცენტია, მაგრამ ამ ომის დასასრულებლად დიდ პროგრესს მივაღწიეთ; ეს მართლაც ყველაზე მომაკვდინებელი ომია მეორე მსოფლიო ომის შემდეგ, სავარაუდოდ, ყველაზე დიდი ომი მეორე მსოფლიო ომის შემდეგ“, - განაცხადა ტრამპმა.

ტრამპმა ჟურნალისტებს უთხრა: „თუ საქმეები მართლაც კარგად წავიდა, შესაძლოა რამდენიმე კვირა დასჭირდეს, თუ ცუდად წავიდა - უფრო მეტი დრო“.

აშშ-ის პრეზიდენტმა ასევე აღნიშნა, რომ ომის დასრულების მცდელობებში დარჩენილია ერთი ან ორი „ძალიან რთული საკითხი“, რომელთაგან ერთ-ერთი კონფლიქტის დროს უკვე დაკავებულ ტერიტორიებს ეხება.

ტრამპმა დაამატა, რომ რუსეთის პრეზიდენტ ვლადიმერ პუტინთან უკრაინის ომისშემდგომი აღდგენის საკითხი განიხილა და მოსკოვი მას დაეხმარება, მათ შორის „ენერგიის, ელექტროენერგიისა და სხვა რესურსების ძალიან დაბალ ფასებში მიწოდებით“.

ტრამპმა აღნიშნა, რომ ბოლო სამშვიდობო გეგმაში პროგრესის მისაღწევად მან უკრაინის პარლამენტის წინაშე სიტყვით გამოსვლა შესთავაზა: „არ ვარ დარწმუნებული, რამდენად აუცილებელია ეს, მაგრამ თუ ეს თვეში 25,000 სიცოცხლის გადარჩენაში დაგვეხმარება, მე ამისთვის ნამდვილად მზად ვარ“.

ზელენსკი

ზელენსკიმ ტრამპთან და ევროპელ ლიდერებთან შეხვედრის შემდეგ განაცხადა: „შევთანხმდით, რომ ჩვენი გუნდები მომდევნო კვირებში შეხვდებიან ერთმანეთს ყველა განხილული საკითხის დასასრულებლად“.

ზელენსკიმ ასევე თქვა, რომ ტრამპი იანვარში ვაშინგტონში უკრაინელ და სხვა ევროპელ ლიდერებს უმასპინძლებს.

ტრამპმა ზელენსკის ფლორიდაში, პალმ-ბიჩში მდებარე მარ-ა-ლაგოს რეზიდენციაში უმასპინძლა, რათა თითქმის ოთხწლიანი კონფლიქტის დასრულების გეგმა განეხილათ. ზელენსკი აშშ-ში კვირას, კანადაში ვიზიტის შემდეგ ჩავიდა.

ამავდროულად, ვლადიმერ პუტინის სპეციალურმა წარმომადგენელმა, კირილ დმიტრიევმა განაცხადა, რომ მსოფლიო აფასებს ტრამპის სამშვიდობო ძალისხმევას.

დმიტრიევმა, რომელიც რუსეთის სპეციალური წარმომადგენელია უცხო ქვეყნებთან ინვესტიციებისა და ეკონომიკური თანამშრომლობის საკითხებში, სოციალურ ქსელ X-ში დაწერა: „მთელი მსოფლიო აფასებს პრეზიდენტ ტრამპისა და მისი გუნდის სამშვიდობო ძალისხმევას“.