გერმანულ მედიაზე დაყრდნობით, რომელიც პოლიციის ინფორმაციას ავრცელებს, ბერლინის ცენტრში გამართული აღლუმის დროს ავტომობილი ხალხის მასაში შეიჭრა, რის შედეგადაც ერთი ადამიანი დაიღუპა, ხოლო 10-ზე მეტი დაშავდა.
შემთხვევა შაბათს, ადგილობრივი დროით დაახლოებით 22:00 საათზე, ტიერგარტენის რაიონში გამართული აღლუმის დროს მოხდა.
გაზეთმა BILD-მა თვითმხილველებზე დაყრდნობით გაავრცელა ინფორმაცია, რომ თეთრი მიკროავტობუსი დიდი სიჩქარით შევარდა ხალხში.
შემთხვევის შემდეგ საგანგებო სიტუაციების მართვის ცენტრში მრავალი დაშავებულის შესახებ განგაში გამოცხადდა. სახანძრო სამსახურის პრესსპიკერმა განაცხადა, რომ შემთხვევის ადგილზე 44 მაშველი იქნა გაგზავნილი.
ტერიტორიაზე დიდი რაოდენობით პოლიციაც გაიგზავნა; ხელისუფლებამ მოქალაქეებს სთხოვა ღონისძიების ადგილის დატოვება და საგანგებო სამსახურების მითითებების შესრულება.
მძღოლისა და შემთხვევის მიზეზის შესახებ სხვა დეტალები ჯერჯერობით არ სახელდება.
