ეგვიპტის საგარეო საქმეთა მინისტრი ბადრ აბდელატი ისლამაბადში ოფიციალური ვიზიტით იმყოფებოდა და ეგვიპტის პრეზიდენტის, აბდელ ფატაჰ ალ-სისის წერილობითი გზავნილი პაკისტანელ კოლეგას, ასიფ ალი ზარდარის გადასცა.
ეგვიპტის საგარეო საქმეთა მინისტრმა ბადრ აბდელატიმ კვირას განაცხადა, რომ კაიროს სურს, პაკისტანთან სხვადასხვა სფეროში თანამშრომლობის გაძლიერების მიზნით, 2026 წლისთვის ერთობლივი სამოქმედო გეგმა მოამზადოს.
ეგვიპტის საგარეო საქმეთა სამინისტროს განცხადებაში აღნიშნულია, რომ აბდელატიმ ოფიციალური ვიზიტისას ეგვიპტის პრეზიდენტის, აბდელ ფატაჰ ალ-სისის წერილობითი გზავნილი პაკისტანელ კოლეგას, ასიფ ალი ზარდარის გადასცა, რომელიც ორმხრივი კავშირების გაღრმავებას ეხებოდა.
აბდელატიმ ასევე ხაზი გაუსვა გაეროს უშიშროების საბჭოს ღაზასთან დაკავშირებული №2803 რეზოლუციის აღსრულებისა და აშშ-ის პრეზიდენტის, დონალდ ტრამპის მიერ მომზადებული ცეცხლის შეწყვეტის გეგმის მეორე ეტაპზე გადასვლის აუცილებლობას, რომელიც პალესტინის რეგიონში ძალაში 10 ოქტომბერს შევიდა.
ეგვიპტელმა მინისტრმა აღნიშნა, რომ რეზოლუციის შესაბამისად, ცეცხლის შეწყვეტის შესანარჩუნებლად აუცილებელია, საერთაშორისო სტაბილიზაციის ძალებმა სრული დატვირთვით იმუშაონ.
აბდელატიმ განიხილა ღაზას ადრეული რეაბილიტაციის, რეკონსტრუქციისა და განვითარების საკითხებზე საერთაშორისო კონფერენციის სამზადისი, რომელიც ნოემბერში უნდა ჩატარებულიყო, თუმცა ჯერ არ გამართულა.
თურქეთის, ეგვიპტისა და კატარის შუამავლობით, ასევე აშშ-ის მხარდაჭერით მიღწეულმა ცეცხლის შეწყვეტის შეთანხმებამ შეაჩერა ისრაელის თავდასხმები, რომლებიც 2023 წლის ოქტომბრიდან გრძელდებოდა და რომელსაც 70 000-ზე მეტი ადამიანის სიცოცხლე ემსხვერპლა, 170 000-ზე მეტი კი დაშავდა; დაღუპულთა უმეტესობა ქალები და ბავშვები არიან.
ცეცხლის შეწყვეტის შეთანხმების პირველი ეტაპი პალესტინელი პატიმრების სანაცვლოდ ისრაელელი მძევლების გათავისუფლებას ითვალისწინებს. გეგმა ასევე მოიცავს ღაზას აღდგენას და მართვის ახალი მექანიზმის ჩამოყალიბებას, რომელშიც „ჰამასი“ არ იქნება ჩართული.
