საგარეო საქმეთა მინისტრი ფიდანი მაიამიში ღაზას საკითხზე დაგეგმილ შეხვედრაში მიიღებს მონაწილეობას

თურქეთის საგარეო უწყების ხელმძღვანელი ჰაქან ფიდანი პარასკევს აშშ-ის ქალაქ მაიამიში დაესწრება შეხვედრას, რომლის დღის წესრიგის მთავარი თემა ღაზაა.

საგარეო საქმეთა სამინისტროს მიერ გავრცელებულ განცხადებაში ნათქვამია: „ჩვენი მინისტრი ხვალ (19 დეკემბერს), ქალაქ მაიამიში, აშშ-ის, ეგვიპტისა და კატარის ოფიციალური პირების მონაწილეობით გამართულ ღაზას საკითხზე მიძღვნილ შეხვედრაში მიიღებს მონაწილეობას. შეხვედრის ფარგლებში ასევე გაიმართება მოლაპარაკებები სხვა რეგიონულ საკითხებთან დაკავშირებით.“

მანამდე თეთრი სახლის ოფიციალურმა წარმომადგენელმა სააგენტო „ანადოლუს“ განუცხადა, რომ სპეციალური წარმომადგენელი სტივ ვიტკოფი თურქეთის, კატარისა და ეგვიპტის წარმომადგენლებს შეხვდებოდა, რათა ღაზაში ცეცხლის შეწყვეტის შეთანხმების შემდეგი ეტაპი განეხილათ.

ეს შეხვედრა ტარდება ისრაელსა და „ჰამასს“ შორის ცეცხლის შეწყვეტის ძალაში შესვლიდან დაახლოებით ორი თვის შემდეგ. შეთანხმების პირველი ეტაპი მოიცავდა საბრძოლო მოქმედებების შეწყვეტას, ისრაელის ძალების ნაწილობრივ გაყვანას, მძევლებისა და პატიმრების გაცვლას და პალესტინის დასახლებებში სრულმასშტაბიანი ჰუმანიტარული დახმარების შეტანას.

აშშ-ის პრეზიდენტ დონალდ ტრამპის 20-პუნქტიანი გეგმით გათვალისწინებული მეორე ეტაპი მოითხოვს საერთაშორისო სტაბილურობის ძალების (ISF) განლაგებას, „ჰამასის“ განიარაღებას, ისრაელის სრულ გასვლას რეგიონიდან და „ტექნოკრატიული“ პალესტინური კომიტეტის შექმნას, რომელიც დროებით მართავს ღაზას.

პალესტინელები ისრაელს არაერთხელ ადანაშაულებენ ცეცხლის შეწყვეტის შეთანხმების დარღვევაში, რომელმაც შეაჩერა ორწლიანი ომი. 2023 წლის ოქტომბრიდან მოყოლებული ამ ომს 70 000-ზე მეტი ადამიანი ემსხვერპლა (უმეტესად ქალები და ბავშვები), ხოლო 170 000-ზე მეტი დაშავდა.

ღაზას ჯანდაცვის უწყებების მონაცემებით, ცეცხლის შეწყვეტის ძალაში შესვლის შემდეგ, ისრაელის თავდასხმების შედეგად სულ მცირე 395 პალესტინელი დაიღუპა და 1088 დაშავდა.