გავრცელებული ინფორმაციით, არაბთა გაერთიანებული საამიროების ავიაკომპანია „Flydubai“-ს სამგზავრო თვითმფრინავმა, რომელიც დუბაი-თელ-ავივის რეისს ასრულებდა, „ჰაერში საგანგებო მდგომარეობისა და გატაცების“ შესახებ სიგნალი გააგზავნა.

ისრაელში მოქმედი „მე-12 არხის“ ცნობით, დუბაიდან აფრენილმა თვითმფრინავმა, იორდანიის საჰაერო სივრცეში ფრენისას, ჯერ ზოგადი საგანგებო მდგომარეობის აღმნიშვნელი კოდი „7700“, ხოლო მცირე ხანში - თვითმფრინავის გატაცების აღმნიშვნელი კოდი „7500“ გამოუშვა.

სიგნალების მიღების შემდეგ, ისრაელის საჰაერო ძალების გამანადგურებლები თვითმფრინავის მიმართულებით აფრინდნენ. გავრცელებული ინფორმაციით, იორდანიის ცაში გარკვეული დროის განმავლობაში წრიული ფრენის განმახორციელებელი თვითმფრინავი, რომელშიც დაახლოებით 100 ისრაელის მოქალაქე იმყოფებოდა, მოგვიანებით საუდის არაბეთის მიმართულებით გადამისამართდა.

ოფიციალური პირების განცხადებით, თვითმფრინავს ისრაელში დაჯდომის ნება არ დართეს და ამ დროისთვის მასთან კავშირი დამყარებული არ არის.