ირანის საპროტესტო აქციების დროს დაღუპულთა რაოდენობამ 3 000-ს გადააჭარბა

უფლებადამცველმა ორგანიზაციამ შაბათს განაცხადა, რომ ირანში მიმდინარე საპროტესტო აქციების დროს 3 000-ზე მეტი ადამიანი დაიღუპა. ქვეყანაში რვადღიანი ინტერნეტბლოკადის შემდეგ ინტერნეტაქტივობის „ძალიან მცირე ზრდა“ დაფიქსირდა.

აშშ-ში ბაზირებულმა ორგანიზაციამ HRANA-მ დაადასტურა 3 090 ადამიანის გარდაცვალება (მათგან 2 885 მომიტინგეა). ეს ინფორმაცია გავრცელდა მას შემდეგ, რაც ადგილობრივმა მაცხოვრებლებმა განაცხადეს, რომ რეპრესიებმა საპროტესტო აქციები ამ დროისთვის დიდწილად ჩაახშო, სახელმწიფო მედიამ კი დაკავებულთა რაოდენობის გაზრდის შესახებ გამოაცხადა.

სააგენტო Reuters-თან საუბრისას რამდენიმე ადგილობრივმა აღნიშნა, რომ დედაქალაქ თეირანში უკვე ოთხი დღეა შედარებითი სიმშვიდეა. ქალაქის თავზე უპილოტო საფრენი აპარატები დაფრინავენ, თუმცა ხუთშაბათსა და პარასკევს დიდი საპროტესტო აქციების ნიშნები არ ყოფილა.

კასპიის ზღვის სანაპიროზე ჩრდილოეთით მდებარე ქალაქის ერთ-ერთმა მაცხოვრებელმა ასევე თქვა, რომ იქაც ქუჩებში სიმშვიდეა.

საპროტესტო აქციები 28 დეკემბერს ეკონომიკური სირთულეების გამო დაიწყო და ფართომასშტაბიან დემონსტრაციებში გადაიზარდა.

ინტერნეტ-მონიტორინგის ჯგუფმა NetBlocks-მა პლატფორმა X-ზე დაწერა: „გაზომვები აჩვენებს, რომ ამ დილით ირანში ინტერნეტკავშირის ძალიან მცირე ზრდა შეინიშნება“. ჯგუფის ინფორმაციით, 200-საათიანი გათიშვის შემდეგ კავშირი ჩვეულებრივი დონის მხოლოდ დაახლოებით 2%-ს შეადგენს.

უცხოეთში მცხოვრებმა რამდენიმე ირანელმა სოციალურ ქსელში აღნიშნა, რომ შაბათს დილით ირანში მყოფ მომხმარებლებთან შეტყობინებების გაცვლა შეძლეს.

აშშ-ის პრეზიდენტი დონალდ ტრამპი, რომელიც ირანს მომიტინგეების სიკვდილით დასჯის შემთხვევაში „ძალიან მკაცრი ზომებით“ ემუქრებოდა, აცხადებს, რომ თეირანის ლიდერებმა მასობრივი სიკვდილით დასჯა გააუქმეს.

ტრამპმა სოციალურ ქსელში გამოქვეყნებულ პოსტში დაწერა: „დიდ პატივს ვცემ იმ ფაქტს, რომ ირანის ხელისუფლებამ გააუქმა ყველა დაგეგმილი სიკვდილით დასჯა, მათ შორის ის 800-ზე მეტი განაჩენი, რომელიც გუშინ უნდა აღსრულებულიყო. გმადლობთ!“

ირანს მსგავსი სიკვდილით დასჯის გეგმების ან მათი გაუქმების შესახებ ოფიციალური ინფორმაცია არ გაუვრცელებია.