სირიის პრეზიდენტის ადმინისტრაციის მიერ გავრცელებული განცხადების თანახმად, აშშ-ის პრეზიდენტმა დონალდ ტრამპმა და სირიის პრეზიდენტმა აჰმედ შარამ სატელეფონო საუბრისას სირიის აღდგენის, რეაბილიტაციისა და რეგიონული სტაბილურობის მხარდაჭერის ძალისხმევა განიხილეს.
სირიის პრეზიდენტის ადმინისტრაციის განცხადებით, შარამ ტრამპს უთხრა, რომ სირიის წინააღმდეგ დაწესებული სანქციების გაუქმება ქვეყნის ეკონომიკური გაჯანსაღებისა და აღდგენის უზრუნველსაყოფად ფუნდამენტური ნაბიჯი იქნება.
განცხადებაში აღნიშნულია, რომ ტრამპმა ხაზი გაუსვა სტაბილურობის შენარჩუნებისა და სირიის აღდგენისა და რეაბილიტაციის ძალისხმევის მხარდაჭერის მნიშვნელობას.
განცხადების თანახმად, აშშ-ის პრეზიდენტმა ასევე აღნიშნა, რომ რეგიონული უსაფრთხოებისა და მშვიდობის გასაძლიერებლად და რეგიონში დაძაბულობის შემდგომი ესკალაციის თავიდან ასაცილებლად პრიორიტეტი დიპლომატიასა და დიალოგს უნდა მიენიჭოს.
საუბრისას ორმა ლიდერმა განიხილა სირიის აღდგენის მხარდასაჭერად მიმდინარე ძალისხმევა და შეაფასა რეგიონული მოვლენები.
