ისრაელის თავდაცვის მინისტრმა ისრაელ კაცმა შაბათს გაკეთებულ განცხადებაში აღნიშნა, რომ ეროვნული უსაფრთხოების სერიოზული საფრთხეების მოტივით, ისრაელმა ირანის წინააღმდეგ „პრევენციული დარტყმა“ განახორციელა.
კაცმა მოუწოდა მოქალაქეებს, დაემორჩილონ შიდა ფრონტის სარდლობის მითითებებს და ქვეყნის მასშტაბით საგანგებო მდგომარეობა გამოაცხადა.
მისი სამინისტროს მიერ გავრცელებულ განცხადებაში ნათქვამია: „ისრაელის სახელმწიფომ ირანის წინააღმდეგ ’პრევენციული დარტყმა’ დაიწყო. თავდაცვის მინისტრმა ისრაელ კაცმა ქვეყნის მასშტაბით გამოაცხადა სპეციალური საგანგებო მდგომარეობა, რომელიც დაუყოვნებლივ შედის ძალაში“.
თვითმხილველები იტყობინებიან, რომ თეირანის ცენტრში ძლიერი აფეთქება მოხდა და სქელი კვამლი ამოიფრქვა. ირანის მთავრობას ჯერჯერობით ოფიციალური განცხადება არ გაუკეთებია.
საინფორმაციო სააგენტო Fars-ის ცნობით, აფეთქების ხმები ისმოდა ისპაჰანში, ყუმში, ქარაჯსა და ქირმანშაჰშიც.
თავდასხმა განხორციელდა ირანის ბირთვული პროგრამის თაობაზე აშშ-სთან მიმდინარე მოლაპარაკებების ფონზე მზარდი დაძაბულობის პირობებში.
ისრაელის არმიამ, შესაძლო სარაკეტო საფრთხეების წინააღმდეგ პრევენციის მიზნით, საჰაერო განგაშის სირენები აამუშავა.
არმიამ ასევე გამოაცხადა „საგანმანათლებლო საქმიანობის, მასობრივი ღონისძიებებისა და სამუშაო ადგილების“ აკრძალვის შესახებ.
სამხედრო განცხადებაში აღნიშნულია, რომ „სასიცოცხლო მნიშვნელობის სექტორები“ ამ აკრძალვისგან გათავისუფლებულნი არიან.
ირანის მთელი ხელმძღვანელობა სამიზნე გახდა
ანონიმურმა ამერიკელმა მაღალჩინოსანმა და ოპერაციის შესახებ ინფორმირებულმა პირმა, რომლებმაც ვინაობის გამჟღავნება სენსიტიური სამხედრო ოპერაციების გამო არ ისურვეს, განაცხადეს, რომ აშშ მონაწილეობდა ირანზე თავდასხმაში, თუმცა მონაწილეობის მასშტაბი ჯერჯერობით გაურკვეველია.
Reuters-თან საუბრისას აშშ-ის კიდევ ერთმა ოფიციალურმა პირმა აღნიშნა, რომ თავდასხმები განხორციელდა ჰაერიდან და ზღვიდან.
ირანმა და ისრაელმა საჰაერო სივრცის დაკეტვის შესახებ გამოაცხადეს.
პირველი გავრცელებული ინფორმაციით, თავდასხმის სამიზნე გახდა ტერიტორია, რომელიც ირანის უზენაესი ლიდერის, აიათოლა ალი ხამენეის ოფისებთან ახლოს მდებარეობს.
გაურკვეველია, იმყოფებოდა თუ არა 86 წლის ხამენეი იმ დროს აღნიშნულ ტერიტორიაზე. ერთ-ერთმა ოფიციალურმა პირმა Reuters-ს განუცხადა, რომ ხამენეი თეირანის გარეთ, უსაფრთხო ადგილას გადაიყვანეს.
ირანის საინფორმაციო სააგენტო ISNA-მ გაავრცელა ინფორმაცია, რომ ისრაელის პირველივე დარტყმების შედეგად დაიღუპა და დაიჭრა „ისლამური რევოლუციის გუშაგთა კორპუსის“ არაერთი წევრი, მათ შორის საკვანძო ოპერატიული პერსონალი.
ინფორმაცია განახლდება…
