თურქეთი, მომავალ კვირას ანკარაში დაგეგმილი ნატოს სამიტის ფარგლებში, წარადგენს „აი ილდიზის“ გაერთიანებულ შტაბს - ახალი თაობის სამხედრო ბაზას, რომელიც ქვეყნის თავდაცვის მართვის ერთ ცენტრში მოსაქცევადაა შექმნილი.
შტაბს საფუძველი 2021 წლის 30 აგვისტოს, პრეზიდენტ რეჯეფ თაიფ ერდოღანის მონაწილეობით ჩაეყარა. ამჟამად შენობის ძირითადი სამშენებლო სამუშაოების უდიდესი ნაწილი დასრულებულია.
„აი ილდიზის“ გაერთიანებული შტაბი თურქეთის შეიარაღებული ძალების სარდლობის სტრუქტურას ერთ კომპლექსში მოაქცევს; ის გააერთიანებს ეროვნული თავდაცვის სამინისტროს, გენერალურ შტაბსა და სახმელეთო, საზღვაო და სამხედრო-საჰაერო ძალების სარდლობებს. ამავდროულად, იგი სტრატეგიულ წვლილს შეიტანს ერთობლივი ოპერაციებისა და მართვის შესაძლებლობების განვითარებაში.
კომპლექსი, რომელიც თურქეთის დროშაზე გამოსახული ნახევარმთვარითა და ვარსკვლავითაა შთაგონებული, თავისი უნიკალური არქიტექტურით, „ჭკვიანი შენობის“ კონცეფციით, გარემოსდამცველი სტრუქტურითა და მაღალტექნოლოგიური ინფრასტრუქტურით, შექმნილია თურქეთის შეიარაღებული ძალების როგორც არსებული, ისე მომავალი საჭიროებების უმაღლეს დონეზე დასაკმაყოფილებლად.
პროექტი აღჭურვილია უახლესი ტექნოლოგიებით - დაწყებული კიბერუსაფრთხოებითა და ბალისტიკური დაცვით, დამთავრებული ქიმიური, ბიოლოგიური, რადიოლოგიური და ბირთვული (CBRN) საფრთხეებისგან თავდაცვის ზომებით. მოსალოდნელია, რომ მოწინავე საინჟინრო გადაწყვეტილებების წყალობით, იგი მსოფლიოს ერთ-ერთი სანიმუშო სამხედრო შტაბი გახდება. კომპლექსის უსაფრთხოების არქიტექტურა კიდევ უფრო გაძლიერდა „ფოლადის გუმბათის“ კონცეფციის შესაბამისი ზომებით.
სტრატეგიული ცენტრი
„აი ილდიზის“ შტაბი იქნება სტრატეგიული ცენტრი, რომელიც გააძლიერებს ეროვნული თავდაცვის სამინისტროს ინსტიტუციურ ინტეგრაციას, გაზრდის თურქეთის შეიარაღებული ძალების ერთობლივი ოპერაციების წარმოების შესაძლებლობებს და განასახიერებს თურქეთის თავდაცვის ხედვას „თურქეთის საუკუნის“ მიზნების ფარგლებში.
შტაბი, რომელმაც ცოტა ხნის წინ თავდაცვის სამინისტროს ყოველკვირეული ბრიფინგის დროს მედიის წარმომადგენლებისთვის კარი გააღო, პირველ ოფიციალურ ღონისძიებას 7-8 ივლისს ანკარაში გასამართი ნატოს წევრი ქვეყნების სახელმწიფო და მთავრობის მეთაურების სამიტის ფარგლებში უმასპინძლებს.
სამიტის ფარგლებში, „აი ილდიზის“ შტაბში სტუმარი თავდაცვის მინისტრებისა და ნატოს მაღალჩინოსნების პატივსაცემად მიღება გაიმართება.
დაგეგმილია, რომ მიღება კომპლექსის „ვარსკვლავის“ ნაწილში ჩატარდეს.
