სამშაბათს თურქეთმა და ნიგერიამ განაცხადეს ახალი მექანიზმების ამოქმედების შესახებ, რომლებიც მიზნად ისახავს ქვეყნებს შორის ეკონომიკური კავშირების მნიშვნელოვან გაფართოებას მრეწველობის, ვაჭრობის, ინვესტიციებისა და თავდაცვის სფეროებში თანამშრომლობის გაღრმავების გზით.
თურქეთის ვაჭრობის მინისტრმა, ომერ ბოლათმა განაცხადა, რომ ნიგერიის პრეზიდენტის, ბოლა აჰმედ ტინუბუს თურქეთში ოფიციალური ვიზიტის ფარგლებში გამართული მოლაპარაკებების შემდეგ, ანკარამ და აბუჯამ ხელი მოაწერეს ერთობლივ დეკლარაციას ერთობლივი ეკონომიკური და სავაჭრო კომიტეტის (JETCO) შექმნის შესახებ და ურთიერთგაგების მემორანდუმს „ჰალალ“ ხარისხის ინფრასტრუქტურის სფეროში.
„შეხვედრაზე დეტალურად განვიხილეთ ის საკითხები, რომლებიც გააღრმავებს ჩვენს თანამშრომლობას მრეწველობის, ვაჭრობის, ინვესტიციებისა და წარმოების სფეროებში“, - აღნიშნა ბოლათმა და დასძინა, რომ ეს შეთანხმებები ახალ შესაძლებლობებს შექმნის ორივე ქვეყნის ბიზნესსექტორისთვის.
ხელი მოეწერა ცხრა შეთანხმებას
ბოლატმა აღნიშნა, რომ ორივე მხარე მუშაობს 5 მილიარდი დოლარის ორმხრივი სავაჭრო მიზნის მისაღწევად და იღებს ვალდებულებას ვაჭრობის დივერსიფიკაციის, ინვესტიციების გაზრდისა და კერძო სექტორებს შორის პარტნიორობის გაძლიერების შესახებ.
მინისტრმა ასევე ხაზგასმით აღნიშნა, რომ თურქეთი ნიგერიასთან ურთიერთობას გააგრძელებს „ნდობასა და გრძელვადიან სტრატეგიულ პარტნიორობაზე დაფუძნებული მიდგომით“.
ანკარაში გამართული ორმხრივი და დელეგაციების დონის შეხვედრების შემდეგ, პრეზიდენტების - რეჯეფ თაიფ ერდოღანისა და ბოლა აჰმედ ტინუბუს თანდასწრებით, სულ ცხრა შეთანხმება გაფორმდა.
შეთანხმებები მოიცავს სამხედრო მომზადებას, თავდაცვასა და უსაფრთხოებას, დიასპორის პოლიტიკას, მედიასა და კომუნიკაციებს, უმაღლეს განათლებას, ჰალალ აკრედიტაციას, დიპლომატიურ მომზადებას, ასევე სოციალურ და ქალთა საკითხებს.
პრეზიდენტმა ტინუბუმ ისაუბრა არასტაბილურობასთან ბრძოლისა და ეკონომიკური ზრდის სტიმულირების ერთობლივ ძალისხმევაზე და აღნიშნა, რომ ნიგერია მიზნად ისახავს თურქეთთან თანამშრომლობის გაღრმავებას, განსაკუთრებით უსაფრთხოებისა და ვაჭრობის სფეროებში.
მზარდი ურთიერთობები
2025 წლის პირველ 11 თვეში ორ ქვეყანას შორის სავაჭრო ბრუნვამ 688,4 მილიონ დოლარს მიაღწია.
გასულ წელს ნიგერია თურქეთის უმსხვილესი სავაჭრო პარტნიორი გახდა სუბსაჰარულ აფრიკაში, ენერგეტიკული ვაჭრობის ჩათვლით.
მხარეებს შორის თავდაცვის სფეროში კავშირები სწრაფად გაიზარდა; ნიგერიის სამხედრო-საჰაერო ძალებმა შეიძინეს თურქული წარმოების უპილოტო საფრენი აპარატები და ექვსი ერთეული ATAK T129 ტიპის მოიერიშე ვერტმფრენი.
თურქული კომპანიები აქტიურად მოღვაწეობენ ნიგერიის მშენებლობის, ენერგეტიკის, ტექსტილისა და წარმოების სექტორებში. 50-ზე მეტმა თურქულმა ფირმამ ქვეყანაში დაახლოებით 400 მილიონი დოლარის ინვესტიცია განახორციელა. თურქი კონტრაქტორების მიერ ნიგერიაში შესრულებული პროექტების ღირებულება კი 3 მილიარდ დოლარს უახლოვდება.
თურქეთმა და ნიგერიამ დიპლომატიური ურთიერთობები 1960 წელს დაამყარეს. მას შემდეგ, რაც აბუჯამ გააძლიერა ბრძოლა შეიარაღებულ დაჯგუფებებთან, ქვეყნებს შორის თანამშრომლობა უსაფრთხოებისა და თავდაცვის მრეწველობის სფეროებში სტაბილურად ფართოვდება.
