სირიის ადამიანის უფლებათა დაცვის ორგანიზაციის ინფორმაციით, დამხობილი ბაშარ ასადის რეჟიმის ერთგული შეიარაღებული დაჯგუფებების თავდასხმების შედეგად სირიის ლატაკიის გარეუბნებში გენერალური უსაფრთხოების სამმართველოს თექვსმეტი თანამშრომელი დაიღუპა და დაიჭრა.
სირიის ოფიციალურმა საინფორმაციო სააგენტო SANA-მ ხუთშაბათს, ანონიმურ უსაფრთხოების წყაროზე დაყრდნობით, გაავრცელა ინფორმაცია, რომ ასადის დამხობილი რეჟიმის მომხრე დაჯგუფებებმა ლატაკიაში, ბეით ანასთან ახლოს, სირიის სამხედრო ძალებს შეუტიეს, რის შედეგადაც ერთი ჯარისკაცი დაიღუპა, ხოლო სხვები დაიჭრნენ.
წყაროს ცნობით, თავდამსხმელებმა ცეცხლი გაუხსნეს სასწრაფო დახმარების მანქანებსაც, რომლებიც დაჭრილების ევაკუაციას ცდილობდნენ. დამატებითი ძალების მოსვლის შემდეგ, მებრძოლებმა ბეით ანაში გამაგრება მოახდინეს და უსაფრთხოების ძალებთან პირდაპირ შეტაკებაზე გადავიდნენ.
SANA-მ ასევე გაავრცელა უსაფრთხოების სხვა წარმომადგენლის განცხადება, რომლის თანახმადაც, ასადის მომხრე მებრძოლებმა ლატაკიაში, ჯებელესთან ახლოს, გენერალური უსაფრთხოების სამმართველოს საკონტროლო პუნქტს შეუტიეს და სამოქალაქო მანქანებიც დაცხრილეს.
„ჩვენმა ძალებმა ამჟამად უსაფრთხოების კორდონი შემოარტყეს ბეით ანასა და დალიას სოფლებში მყოფ ასადის შეიარაღებულ ნარჩენებსა და უკანონო ბანდებს“, - განაცხადა წარმომადგენელმა.
მან ასევე დასძინა, რომ ლატაკიაში უსაფრთხოების ძალებთან შეტაკებაში მყოფი შეიარაღებული დაჯგუფებები „დაკავშირებულია ომის მწარმოებელ სუჰეილ ელ ჰასანთან, რომელიც სირიელების წინააღმდეგ მასობრივ მკვლელობებში იყო ბრალდებული“.
SANA-ს ოფიციალური მონაცემები დანაკარგების შესახებ არ გაუვრცელებია, თუმცა სირიის ადამიანის უფლებათა დაცვის ორგანიზაციამ გამოაქვეყნა ანგარიში, რომელიც ადასტურებს თავდასხმაში 16 დაღუპულის შესახებ ინფორმაციას, თუმცა დამატებითი დეტალები არ მიუთითებია.
თავდასხმები დაგეგმილი იყო
მოგვიანებით სირიის შინაგან საქმეთა სამინისტრომ განაცხადა, რომ ლატაკიის უსაფრთხოების უფროსმა, ვიცე-პოლკოვნიკმა მუსტაფა კნაიფატიმ თავდასხმები დაგეგმილად შეაფასა.
კნაიფატიმ სამინისტროს Telegram-ის არხზე განაცხადა: "ასადის ნარჩენებისგან შემდგარმა რამდენიმე ჯგუფმა თავდასხმები განახორციელა ჩვენს უსაფრთხოების პუნქტებსა და საკონტროლო გამშვებ პუნქტებზე".
მან აღნიშნა, რომ ჯებელესა და მის შემოგარენში უსაფრთხოების პატრულზე მოწყობილი იქნა ჩასაფრებები და დიდი დანაკარგები მოხდა, თუმცა ზუსტი რიცხვი არ დაასახელა.
"ასადის მომხრე მებრძოლებმა ზიანი მიაყენეს ჯებელესა და მის შემოგარენში არსებულ საზოგადოებრივ ინფრასტრუქტურას, თავდასხმები მოხდა სახელმწიფო შენობებზე, საზოგადოებრივ და კერძო საკუთრებაზეც ". - თქვა კნაიფატიმ.
მანვე განაცხადა, რომ ლატაკიის მასშტაბით უსაფრთხოების ძალები სრულ მზადყოფნაში არიან და ჯებელეს მიმდებარე ტერიტორიაზე პირველი თავდასხმა მოიგერიეს, თუმცა ქალაქში შეტაკებები კვლავ გრძელდება.
მან დასძინა, რომ სხვა პროვინციებიდან გაძლიერებული ძალები და თავდაცვის სამინისტროს დამატებითი სამხედრო მხარდაჭერა ადგილზე მივიდა.
კნაიფატიმ ასევე დასძინა, რომ სხვა პროვინციებიდან დამატებით ძალები, ისევე როგორც თავდაცვის სამინისტროს დამატებითი სამხედრო დახმარება უკვე გზაშია და განაცხადა: "ჩვენს ხალხს ვარწმუნებთ, რომ ვაკონტროლებთ ამ მოღალატურ თავდასხმას და აღმოვფხვრით ამ ჯგუფებს, რითაც უზრუნველვყოფთ სტაბილურობას და დავიცავთ საზოგადოებრივ და კერძო საკუთრებას".
ამ მოვლენების შემდეგ, სირიის დასავლეთში ტარტუსში გენერალური უსაფრთხოების სამმართველომ, „უსაფრთხოების დირექტივებისა და საზოგადოებრივი უსაფრთხოების უზრუნველყოფის მიზნით აუცილებელი ზომების“ მოტივით, ხუთშაბათს, პარასკევ დილამდე ქალაქის მასშტაბით კომენდანტის საათი გამოაცხადა.
სამმართველოს განცხადებაში ნათქვამია: „დღეს, 22:00 საათიდან, პარასკევს, 2025 წლის 7 მარტის დილის 10:00 საათამდე იმოქმედებს საერთო კომენდანტის საათი“.
