აშშ-ის პრეზიდენტის, დონალდ ტრამპის თქმით, მან გასცა განკარგულება, რომ არმია მზად იყოს ირანზე თავდასხმისთვის იმ შემთხვევაში, თუ ირანის მთავრობა მის წინააღმდეგ მკვლელობას ან მკვლელობის მცდელობას განახორციელებს.

პლატფორმა Truth Social-ზე გამოქვეყნებულ პოსტში ტრამპმა აღნიშნა: „1000 რაკეტა ირანის ისლამური რესპუბლიკისკენ არის მიმართული და მზად არის გასასროლად. თუ ირანის მთავრობა სისრულეში მოიყვანს მუქარას ამერიკის შეერთებული შტატების მოქმედი პრეზიდენტის, ანუ ჩემი მკვლელობის ან მკვლელობის მცდელობის შესახებ - რასაც ისინი მსოფლიოს მრავალ წერტილში აჟღერებენ - კიდევ ათასობით რაკეტა გაეშვება“.

„ბრძანებები უკვე გაცემულია და აშშ-ის შეიარაღებული ძალები მზად არიან, სურთ და შესწევთ ძალა, რომ ერთი წლის განმავლობაში (ვადის გაგრძელების შესაძლებლობით) ირანის ყველა რეგიონი სრულად მიწასთან გაასწორონ და გაანადგურონ“, - დაწერა ტრამპმა.

ტრამპის ამ განცხადებებმა Truth Social-ზე, შესაძლოა, ახლო აღმოსავლეთში დაძაბულობის ახალი ესკალაცია გამოიწვიოს.

უკვე რამდენიმე დღეა გრძელდება აშშ-ის საჰაერო დარტყმები ირანის სამიზნეებზე და ირანის თავდასხმები ახლო აღმოსავლეთის სხვადასხვა ქვეყნებში.

მანამდე ტრამპმა გამოაცხადა, რომ ირანთან ცეცხლის შეწყვეტის შეთანხმება „დასრულდა“, თუმცა ვაშინგტონი თეირანის თხოვნით მოლაპარაკებების გაგრძელებას დასთანხმდა.

Wall Street Journal-ის ინფორმაციით, ისრაელმა ახლახან გაუზიარა აშშ-ს სადაზვერვო მონაცემები, რომლებიც მიუთითებს იმაზე, რომ ირანმა ტრამპის მკვლელობის ახალი გეგმა შეიმუშავა.