უკრაინელი ოფიციალური პირების განცხადებით, რუსულმა თავდასხმებმა ქვეყნის აღმოსავლეთ ნაწილში ელექტროენერგიის გათიშვა გამოიწვია. ტემპერატურის ნულს ქვემოთ დაცემის ფონზე, ათასობით ადამიანი შუქისა და გათბობის გარეშე დარჩა.

უკრაინის სახელმწიფო ენერგოოპერატორმა „უკრენერგომ“ განაცხადა, რომ მასშტაბური დრონების თავდასხმის სამიზნე რამდენიმე რეგიონის ენერგეტიკული ინფრასტრუქტურა გახდა.

„მტერმა რამდენიმე რეგიონის ენერგეტიკულ ინფრასტრუქტურაზე მასშტაბური იერიში უპილოტო საფრენი აპარატებით მიიტანა“, — განაცხადა კომპანიამ შუაღამემდე ცოტა ხნით ადრე.

„შედეგად, დნიპროპეტროვსკისა და ზაპორიჟიეს ოლქებში, მათ შორის საოლქო ცენტრებში, მომხმარებელთა უმეტესობა ელექტროენერგიის გარეშე დარჩა“.

დნიპროპეტროვსკის ოლქის სამხედრო ადმინისტრაციის ხელმძღვანელმა, ვლადისლავ გაივანენკომ აღნიშნა, რომ თავდასხმებმა კრიტიკული ინფრასტრუქტურა დააზიანა.

„ვითარება რთულია. თუმცა, როგორც კი უსაფრთხოების მდგომარეობა ამის საშუალებას მოგვცემს, ენერგეტიკოსები სარეაბილიტაციო სამუშაოებს დაიწყებენ“, — დაწერა ვლადისლავ გაივანენკომ Telegram-ზე.

ზაპორიჟიეს ოლქის გუბერნატორის, ივან ფედოროვის თქმით, საკვანძო ობიექტებს ელექტროენერგია უკვე აღუდგა, თუმცა მოსახლეობის უმეტესი ნაწილი კვლავ შუქის გარეშეა.

„ჩვენ დღე და ღამე ვმუშაობთ, რათა ყველა მომხმარებელს რაც შეიძლება მალე მივაწოდოთ ელექტროენერგია“, — განაცხადა მან და დასძინა, რომ წყალმომარაგება დიდწილად უკვე აღდგენილია.

კიევი და მისი მოკავშირეები აცხადებენ, რომ სამოქალაქო ინფრასტრუქტურაზე იერიშების მიზანი ცივ თვეებში მოსახლეობის გამოფიტვა და დათრგუნვაა.