აშშ-ის პრეზიდენტმა დონალდ ტრამპმა შაბათს, მარ-ა-ლაგოს რეზიდენციაში გამართული შეხვედრის შემდეგ, შეაქო თავისი ჰონდურასელი კოლეგა ნასრი ასფურა, რომელსაც საარჩევნო კამპანიის დროს მხარს უჭერდა.
კონსერვატორმა ბიზნესმენმა და ჰონდურასის დედაქალაქ ტეგუსიგალპას ყოფილმა მერმა ასფურამ, მას შემდეგ რაც ნოემბრის არჩევნებში ტრამპის მხარდაჭერით გაიმარჯვა, გასულ კვირას ფიცი დადო და მოვალეობის შესრულებას შეუდგა.
ტრამპი იმუქრებოდა, რომ მისი „მეგობრის“ დამარცხების შემთხვევაში, ცენტრალური ამერიკის ყველაზე ღარიბი ქვეყნისთვის დახმარებას შეწყვეტდა.
ტრამპმა პლატფორმა Truth Social-ზე დაწერა: „ძალიან მნიშვნელოვანი შეხვედრა მქონდა ჩემს მეგობართან, ჰონდურასის პრეზიდენტ ნასრი 'ტიტო' ასფურასთან. მან არჩევნებში მას შემდეგ გაიმარჯვა, რაც ჩემი ძლიერი მხარდაჭერა გამოვუცხადე! ტიტოს და მე ბევრი საერთო ღირებულება გვაქვს „America First“ პრინციპიდან. უსაფრთხოების საკითხებში ჩვენ ძალიან მჭიდრო პარტნიორობა გვაკავშირებს“.
ტრამპმა აღნიშნა, რომ მხარეებმა ინვესტიციებისა და ვაჭრობის საკითხები განიხილეს.
დაგეგმილია, რომ ასფურა კვირას მედიასთან შეხვედრების შესახებ განცხადებას გააკეთებს.
ჰონდურასის პრეზიდენტის ადმინისტრაციამ გაავრცელა ფოტო, რომელზეც ორივე ლიდერი ღიმილის ფონზე აწეული ცერა თითებით არის გამოსახული.
ზეწოლა ქვეყნებზე
მანამდე, 12 იანვარს, ასფურა აშშ-ის სახელმწიფო მდივანს, მარკო რუბიოს შეხვდა; შეხვედრის შემდეგ ორმა ქვეყანამ თავისუფალი ვაჭრობის შეთანხმების გეგმები გამოაცხადა.
ასფურას გამარჯვებამ ტრამპს ლათინურ ამერიკაში კიდევ ერთი მოკავშირე შესძინა მას შემდეგ, რაც ჩილეში, ბოლივიაში, პერუსა და არგენტინაში მემარცხენეები იმ კონსერვატორებმა ჩაანაცვლეს, რომელთა წინასაარჩევნო კამპანიაც განსაკუთრებით კრიმინალსა და კორუფციასთან ბრძოლაზე იყო ორიენტირებული.
ტრამპი აიძულებს ვაშინგტონის უკანა ეზოში მდებარე ქვეყნებს, გააკეთონ არჩევანი ვაშინგტონთან მჭიდრო ურთიერთობასა და პეკინთან სიახლოვეს შორის.
მემარცხენე ლიდერის, სიომარა კასტროს შემცვლელმა ასფურამ განაცხადა, რომ განიხილავს დიპლომატიური ურთიერთობების ჩინეთიდან ავტონომიურ კუნძულ ტაივანზე გადატანას.
ჰონდურასის არჩევნებამდე, დეკემბერში, ტრამპმა მოულოდნელი ნაბიჯი გადადგა და შეიწყალა ასფურას პარტიის წევრი, ყოფილი პრეზიდენტი ხუან ორლანდო ერნანდესი, რომელიც აშშ-ში ნარკოტიკების უკანონო ბრუნვისთვის 45-წლიან სასჯელს იხდიდა.
ერნანდესი მსჯავრდებული იყო ამერიკის შეერთებულ შტატებში 400 ტონა აკრძალული ნივთიერების კონტრაბანდაში დახმარებისთვის.
იმ ფონზე, როდესაც აშშ-ის ძალები კარიბის ზღვაში ნარკოტიკების გადამზიდ ნავებს ანადგურებენ და ვაშინგტონი ზრდის ზეწოლას მადუროზე, რომელსაც ნარკოტრაფიკში ადანაშაულებს, ტრამპის გადაწყვეტილებამ ერნანდესის შეწყალების შესახებ მწვავე კრიტიკა გამოიწვია.
