წყნარი ოკეანის მასშტაბით ცუნამის შესახებ გაფრთხილებების მოხსნით, რუსეთის კამჩატკის ნახევარკუნძულის მახლობლად, ზღვის ქვეშ მომხდარი ძლიერი მიწისძვრის შედეგად სანაპირო ზოლებიდან ევაკუირებული მილიონობით ადამიანი სახლებში დაბრუნებას იწყებს.
8.8 მაგნიტუდის სიმძლავრის ბიძგებმა, რომელიც 1900 წლის შემდეგ ერთ-ერთ ყველაზე ძლიერ მიწისძვრად ითვლება, ცუნამის შესახებ გაფრთხილებები გამოიწვია ათზე მეტ ქვეყანაში, მათ შორის იაპონიაში, შეერთებულ შტატებსა და ეკვადორში.
ზოგიერთ რაიონში ტალღების ოთხ მეტრამდე აწევის პროგნოზმა მასშტაბური შეფერხებები გამოიწვია.
პერუმ წყნარი ოკეანის პორტების ნახევარზე მეტი დახურა, ხოლო ჰავაის კუნძულ მაუიზე ფრენები გაუქმდა.
თუმცა, ოთხშაბათს საღამოსთვის, კატასტროფის შიშების შემცირებასთან ერთად, ქვეყნებმა სათითაოდ დაიწყეს გაფრთხილების დონის დაწევა ან სრულიად გაუქმება.
იაპონიაში, გაფრთხილებების მოხსნამდე, დაახლოებით ორ მილიონ ადამიანს უთხრეს უფრო მაღალ ადგილებზე გადასვლა.
ფუკუსიმას ატომური ელექტროსადგური, რომელიც 2011 წელს ცუნამმა გაანადგურა, სიფრთხილის მიზნით, მცირე ხნით დაცარიელდა.
ადგილობრივი მედიის ცნობით, იაპონიაში ერთადერთი გარდაცვალების შემთხვევა დაფიქსირდა, როდესაც ქალი გაქცევის მცდელობისას მანქანით ხევში გადავარდა.
ჩილემ სანაპირო ზოლიდან 1.4 მილიონი ადამიანის ევაკუაცია განახორციელა, რაც შინაგან საქმეთა სამინისტრომ ქვეყნის ისტორიაში "შესაძლო, ყველაზე დიდ ევაკუაციად" შეაფასა.
მოგვიანებით, ხელისუფლებამ განაცხადა, რომ არანაირი მსხვერპლი ან დაზიანება არ დაფიქსირებულა და ტალღებმა მხოლოდ 60 სანტიმეტრს მიაღწია.
ეკვადორის გალაპაგოსის კუნძულებზე, სადაც სამ მეტრამდე ტალღებს ელოდნენ, ზღვა მხოლოდ ერთი მეტრით აიწია და ზიანი არ დაფიქსირებულა.
"ყველაფერი მშვიდია, მე სამსახურში ვბრუნდები", - თქვა სანტა კრუზის მცხოვრებმა, იზაბელ გრიხალვამ.
განცხადებებმა, საგანგებო სიტუაციების შესახებ გაფრთხილებებმა და პარკების დახურვამ პლაჟებისა და სანაპირო ზოლების დაცარიელება გამოიწვია.
ტურისტები სწრაფად ევაკუირებულ იქნენ ნავებიდან და დაზარალებულ რაიონებში სკოლები დაიხურა.
ყველაზე მეტად დაზარალებული ადგილი რუსეთი
ცუნამის ყველაზე დიდი გავლენა რუსეთში დაფიქსირდა, სადაც ცუნამის ტალღამ სევერო-კურილსკის საპორტო ქალაქს გადაუარა, ადგილობრივი თევზის გადამამუშავებელი ქარხანა დატბორა და ნამსხვრევები შიდა რაიონებში წაიღო.
რუსეთის სახელმწიფო ტელევიზიით გავრცელებულ კადრებში ჩანდა, რომ შენობები და აღჭურვილობა ზღვაში მიჰქონდა.
მიუხედავად მისი სიძლიერისა, მიწისძვრამ რუსეთის შორეულ აღმოსავლეთში მცირე ზიანი და მსუბუქი დაზიანებები გამოიწვია.
მეცნიერებმა ასევე განაცხადეს, რომ მიწისძვრიდან მალევე კლიუჩევსკოის ვულკანი ამოიფრქვა და ფერდობებზე "ალისფერი ცხელი ლავა" ჩამოედინა, ხოლო ხილული აფეთქებები დაფიქსირდა.
აშშ-ის გეოლოგიური კვლევების თანახმად, ეს მიწისძვრა 1900 წლის შემდეგ გლობალურად დაფიქსირებულ 10 ყველაზე ძლიერ მიწისძვრას შორის იყო.
მიწისძვრის შემდეგ ათობით განმეორებითი ბიძგი დაფიქსირდა, მათ შორის 6,9 მაგნიტუდის სიმძლავრის ერთი ბიძგი.
რუსმა სეისმოლოგებმა გააკეთეს გაფრთხილება, რომ უახლოეს დღეებში შესაძლებელია 7.0 მაგნიტუდის ან მეტი სიმძლავრის განმეორებითი ბიძგები მოხდეს.
