„ეროვნული ნების პლატფორმის“ (Milli İrade Platformu) ქვეშ გაერთიანებულმა თურქულმა არასამთავრობო ორგანიზაციებმა და ზოგიერთმა თურქულმა საფეხბურთო კლუბმა მოსახლეობას მოუწოდეს, 1 იანვარს სტამბოლში, გალათას ხიდზე გამართულ მიტინგში მიიღონ მონაწილეობა, რათა ხმა აიმაღლონ პალესტინაში მიმდინარე ხოცვა-ჟლეტის წინააღმდეგ.
თურქეთის ახალგაზრდობისა და განათლების მომსახურების ფონდის (TÜRGEV) სამეთვალყურეო საბჭოს თავმჯდომარემ, ჰათიჯე ილმაზმა სააგენტო „ანადოლუ“-სთან საუბრისას აღნიშნა, რომ პალესტინის საკითხი სამოქალაქო საზოგადოებისთვის მრავალშრიანი პასუხისმგებლობის სფეროა. ილმაზმა ხაზი გაუსვა არასამთავრობო ორგანიზაციებისა და საზოგადოებრივი აზრის მნიშვნელობას პალესტინის ადვოკატირების საქმეში და აღნიშნა, რომ თურქეთი პალესტინას თავიდანვე მხარს უჭერდა როგორც დიპლომატიურ და საერთაშორისო პლატფორმებზე, ისე ჰუმანიტარული დახმარებით.
„თურქეთმა ღაზას საკითხზე პასუხისმგებლობა აიღო. ისრაელი არ იცავს ცეცხლის შეწყვეტის წესებს და მრავალჯერ არღვევს სამართლებრივ და ჰუმანიტარულ ნორმებს. ამ ეტაპზე რეაგირებას უდიდესი მნიშვნელობა აქვს“, - განაცხადა მან.
ილმაზმა ყურადღება გაამახვილა იმაზე, რომ ცეცხლის შეწყვეტის გადაწყვეტილების შემდეგ დასავლეთის ქვეყნებში მასობრივი პროტესტი შემცირდა: „ევროპასა და აშშ-ში სახალხო დემონსტრაციები თითქმის შეწყდა. ჩვენ 1 იანვარს ვიკრიბებით, რათა დავარღვიოთ ეს სიჩუმე და შევინარჩუნოთ ცნობიერება. ჩვენი მიზანია უზრუნველვყოთ, რომ პალესტინა არ იქნას დავიწყებული“.
მან ასევე მიუსამძიმრა იალოვაში ტერორისტული ორგანიზაცია დაეში-ს წინააღმდეგ ჩატარებული ოპერაციისას დაღუპული პოლიციელების ოჯახებს და დაჭრილებს მალე გამოჯანმრთელება უსურვა. „ყველა მოქალაქეს მოვუწოდებ, ხუთშაბათს, 1 იანვარს, პალესტინის მხარდასაჭერად და ჩვენი გმირების მოსაგონებლად გალათას ხიდზე გაერთიანდნენ“, - დასძინა მან.
„დღეს მსოფლიო მშვიდობისა და სტაბილურობისთვის ყველაზე დიდი საფრთხე ისრაელია“
ÖNDER-ის იმამ ჰათიფის სკოლების ასოციაციის თავმჯდომარემ, აბდულა ჯეილანმა განაცხადა, რომ „1 იანვრის მოწოდება“ მხოლოდ პალესტინით ან ღაზათი არ შემოიფარგლება და მას უნივერსალური მნიშვნელობა აქვს. მისი თქმით, ეს მოწოდება მთელ კაცობრიობას მსოფლიო მშვიდობის, გლობალური ძმობისა და ჰარმონიის სახელით ეგზავნება.
„როდესაც უკან ვიხედავთ, ნათლად ჩანს, რომ დღეს მსოფლიო მშვიდობისა და სტაბილურობისთვის ყველაზე დიდი საფრთხე ისრაელია“, - თქვა ჯეილანმა. მან შეახსენა საზოგადოებას, რომ 2025 წელი დასასრულს უახლოვდება და ინსტიტუტები თუ ქვეყნები წლიურ ანგარიშებს ამზადებენ: „შეხედეთ, რა იქნებოდა ისრაელის 2025 წლის წელიწდეულში? არის იქ თუნდაც ერთი პუნქტი, რომელიც კაცობრიობას ან მსოფლიო მშვიდობას რამეში ეხმარება? რა თქმა უნდა, არა. ისრაელის 2025 წლის მატიანეში მხოლოდ უდანაშაულოების მკვლელობა, კარვებში ბავშვების დაწვა, მილიონობით ადამიანის დევნილობა, ათიათასობით ადამიანის ხოცვა და სხვა ქვეყნებზე თავდასხმებია. იქ მხოლოდ სისხლი, ცრემლი და ჩაგვრაა“.
ჯეილანმა ხაზი გაუსვა, რომ პალესტინაში მიმდინარე მოვლენები თითქმის საუკუნოვანი ოკუპაციისა და გენოციდის პოლიტიკის ანარეკლია, რაც ბოლო ორი წელია მთელი მსოფლიოს თვალწინ გრძელდება. „ჩვენ ვებრძვით მსოფლიოს უდიდეს სიმსივნურ უჯრედს და ის უნდა შეჩერდეს“, - განაცხადა მან.
ჯეილანმა ასევე გააკრიტიკა საერთაშორისო ინსტიტუტების დუმილი და აღნიშნა, რომ ისრაელი, ცეცხლის შეწყვეტის მიუხედავად, კვლავ ესხმის თავს ღაზას, საერთაშორისო სისტემა კი ჩამოიშალა და გარანტორ ქვეყნებს შორის პროტესტს მხოლოდ თურქეთი გამოთქვამს.
„ცოდნის გავრცელების საზოგადოების“ (İlim Yayma Cemiyeti) პრეზიდენტმა ტულუნმა კი აღნიშნა, რომ მსვლელობა მესამედ ტარდება პალესტინის შესახებ ცნობიერების განახლებისთვის და 1 იანვარს გალათაზე ყოფნა ჰუმანიტარული და მორალური მოვალეობაა.
თურქული საფეხბურთო კლუბები გულშემატკივრებს სტამბოლის მიტინგისკენ მოუწოდებენ
სტამბოლის მიტინგს მხარდაჭერა გამოუცხადეს თურქულმა საფეხბურთო კლუბებმაც.
„გალათასარაის“ პრეზიდენტმა დურსუნ ოზბექმა ღაზაში მიმდინარე მოვლენებს „კაცობრიობის სინდისის გამოცდა“ უწოდა. „ჩვენ არ მივეჩვევით ამ სიჩუმეს. ჩაგვრის წინააღმდეგ მხარდამხარ ვდგებით და კაცობრიობისთვის ერთ მხარეს ვერთიანდებით. 1 იანვრის დილას ჩვენ ვიქნებით გალათას ხიდზე, რათა ვიყოთ დაჩაგრულთა ხმა“, - განაცხადა ოზბექმა ვიდეომიმართვაში.
„ტრაბზონსპორის“ პრეზიდენტმა ერთუღრულ დოღანმაც მოუწოდა გულშემატკივრებს მონაწილეობისკენ და აღნიშნა, რომ ეს ღონისძიება „მხოლოდ მსვლელობა კი არა, პოზიციაა“. მან მიუთითა, რომ 10 ოქტომბრის ცეცხლის შეწყვეტის შეთანხმება მრავალჯერ დაირღვა: „თქვეს, რომ ცეცხლი შეწყდა, მაგრამ ღაზაში დილა ისევ ბომბებით იწყება. ტრაბზონსპორის საზოგადოება დაჩაგრულების გვერდით დგას“.
„ბეშიქთაშის“ პრეზიდენტმა სერდარ ადალიმაც გაავრცელა ვიდეომიმართვა, სადაც აღნიშნა: „პალესტინაში სისხლი და ცრემლი არ შეწყვეტილა“ და ძალადობის წინააღმდეგ ერთიანობისკენ მოუწოდა საზოგადოებას.
მიტინგს სოციალურ ქსელებში მხარდაჭერა გამოუცხადეს სხვა „სუპერ ლიგის“ კლუბებმაც, მათ შორის: „ფენერბაჰჩემ“, „ბაშაქშეჰირმა“, „კონიასპორმა“, „კაისერისპორმა“ და „გაზიანთეპმა“. რამდენიმე სხვა სპორტულმა კლუბმა ასევე მოუწოდა გულშემატკივრებს მსვლელობაში მონაწილეობისკენ.
