სახელმწიფო საინფორმაციო სააგენტო SUNA-ს მიერ გავრცელებული ინფორმაციით, სუდანის ახალმა პრემიერ-მინისტრმა, კამილ იდრისმა, ქვეყნის გარდამავალი მთავრობა დაითხოვა.

კვირას გამოქვეყნებულ ანგარიშში SUNA-მ არ მიუთითა, როდის გამოცხადდება ახალი მთავრობა, რომელიც პირველი იქნება სუდანის არმიასა და გასამხედროებულ სწრაფი მხარდაჭერის ძალებს შორის ომის დაწყების შემდეგ.

იდრისი სუდანის პრეზიდენტმა და არმიის მთავარსარდალმა, გენერალ-პოლკოვნიკმა აბდელფატაჰ ელ ბურჰანმა დანიშნა. თავის მხრივ, გასამხედროებულმა სწრაფი მხარდაჭერის ძალებმა ამ წლის დასაწყისიდან განაცხადა, რომ მოკავშირე პარტიებთან ერთად საკუთარ პარალელურ მთავრობას შექმნიდა.

იდრისმა შაბათს ფიცი დადო და შეუდგა მოვალეობის შესრულებას, რითაც გახდა ქვეყნის პირველი პრემიერ-მინისტრი 2021 წლის სამხედრო გადატრიალების შემდეგ.

კვირას გამოსვლისას მან პირობა დადო, რომ თანაბარ დისტანციას დაიჭერს ყველა პოლიტიკურ პარტიასთან და პრიორიტეტად აქცევს სუდანში სტაბილურობას, უსაფრთხოებასა და აღდგენას.

ომმა ათიათასობით ადამიანის სიკვდილი და მოსახლეობის თითქმის მეოთხედის, 13 მილიონი ადამიანის იძულებით გადაადგილება გამოიწვია. გაერო ამ სიტუაციას მსოფლიოში ერთ-ერთ უმძიმეს ჰუმანიტარულ კატასტროფად აფასებს.