კოსოვოს პრემიერი: ტრამპთან მიღწეული შეთანხმების თანახმად დეპორტირებული მიგრანტები კოსოვოში ჩავიდნენ

კოსოვოს პრემიერ-მინისტრმა ალბინ კურტიმ ხუთშაბათს განაცხადა, რომ მისმა ქვეყანამ პრეზიდენტ დონალდ ტრამპის ადმინისტრაციასთან მიღწეული შეთანხმების ფარგლებში აშშ-იდან დეპორტირებული მიგრანტების მიღება დაიწყო.

სატელევიზიო ინტერვიუში კურტიმ აღნიშნა, რომ კოსოვო იღებს იმ პირებს, რომელთა „საკუთარ ტერიტორიაზე ნახვაც ამერიკის შეერთებულ შტატებს არ სურს“ და დაადასტურა, რომ ქვეყანაში უკვე ჩავიდა ერთი ან ორი მიგრანტი.

მთავრობის ცნობით, ივნისში ხელმოწერილი შეთანხმება კოსოვოს უფლებას აძლევს, ერთი წლის განმავლობაში მაქსიმუმ 50 მიგრანტს უმასპინძლოს.

მთავრობამ ივნისში გაკეთებულ განცხადებაში აღნიშნა, რომ ამ შეთანხმების ხელმოწერით, ევროპის ერთ-ერთ უღარიბეს ქვეყანას, კოსოვოს სურდა გამოეხატა „უსაზღვრო მადლიერება“ იმ მხარდაჭერისთვის, რომელსაც აშშ 2008 წელს სერბეთისგან გამოყოფის შემდეგ უწევს.

კურტი ხელისუფლებაში თებერვალში მოვიდა, თუმცა მოგვიანებით მისი მთავრობა დაიშალა; 28 დეკემბერს კი ახალი არჩევნები გაიმართება.

ამერიკის შეერთებულმა შტატებმა მკაცრად გააკრიტიკა კურტის პარტია და იგი დეკემბრის არჩევნებში სერბული პოლიტიკური პარტიისთვის მონაწილეობის აკრძალვით კოსოვოს „სტაბილურობის ძირის გამოთხრაში“ დაადანაშაულა.

გარდა ამისა, კოსოვომ დაამტკიცა შეთანხმება დანიასთან, რომლის მიხედვითაც მსჯავრდებულ უცხოელ პატიმრებს სასჯელის მოხდა კოსოვოს ციხეებში შეეძლებათ.