Wall Street Journal-ის ცნობით, პენტაგონი განიხილავს ახლო აღმოსავლეთში დამატებითი სამხედრო ხომალდების გაგზავნის ვარიანტს ჰორმუზის სრუტეში ირანის მიერ თავდასხმების გახშირების გამო.

სტატიაში, აშშ-ის სამ ოფიციალურ პირზე დაყრდნობით, აღნიშნულია, რომ თავდაცვის მდივანმა პიტ ჰეგსეთმა დაამტკიცა აშშ-ის ცენტრალური სარდლობის მოთხოვნა ამფიბიური მზადყოფნის ჯგუფისა და მასთან დაკავშირებული საზღვაო ქვეითთა საექსპედიციო დანაყოფის შესახებ, რომელიც, როგორც წესი, რამდენიმე სამხედრო ხომალდისა და 5 000 საზღვაო ქვეითისგან შედგება.

ორმა ოფიციალურმა პირმა განაცხადა, რომ იაპონიაში დისლოცირებული ხომალდი USS Tripoli და მასთან ერთად მყოფი საზღვაო ქვეითები ახლო აღმოსავლეთისკენ გაემართნენ.

ოფიციალურმა პირებმა ასევე აღნიშნეს, რომ ირანის წინააღმდეგ წარმოებული ომის ფარგლებში რეგიონში უკვე იმყოფებიან აშშ-ის საზღვაო ქვეითები.

პენტაგონმა კი სააგენტო „ანადოლუს“ კითხვაზე სამხედროების მომავალი დისლოცირების გეგმის შესახებ კომენტარი არ გააკეთა.

თავდაცვის მდივანმა ჰეგსეთმა მანამდე გაკეთებულ განცხადებაში უარყო შეშფოთება იმის შესახებ, რომ ირანთან ომი ჰორმუზის სრუტის დიდი ხნით ჩაკეტვას გამოიწვევდა.

ჰეგსეთმა აღნიშნა, რომ ირანი ჰორმუზის სრუტეში სრული უიმედობის მდგომარეობაში მოქმედებს. მან დასძინა, რომ ისინი ამას უმკლავდებიან და სანერვიულო არაფერია.

კითხვაზე, თუ როდის შეძლებს სრუტე სრულფასოვნად ფუნქციონირების აღდგენას, ჰეგსეთმა უპასუხა, რომ გემების გადაადგილებას ხელს მხოლოდ ირანის მხრიდან გემების მისამართით ცეცხლის გახსნა უშლის.

„ჩვენ გვაქვს გეგმები ყველა შემთხვევისთვის. ვმუშაობთ უწყებათაშორის პარტნიორებთან ერთად. არ დავუშვებთ კომერციული საქონლის ნაკადის შეფერხებას ან ამ სრუტის სადავო ტერიტორიად დარჩენას“, — განაცხადა მან.