Washington Post-ის მიერ კვირას თავდაცვის სამინისტროს ოფიციალურ პირებზე დაყრდნობით გავრცელებული ინფორმაციით, პენტაგონმა დაახლოებით 1 500 მოქმედ სამხედრო მოსამსახურეს მისცა მითითება, მზად იყვნენ მინესოტას შტატში შესაძლო გადასროლისთვის.

სტატიაში აღნიშნულია, რომ შტატში ძალადობრივი მოვლენების შესაძლო ესკალაციის გამო, არმიამ ქვედანაყოფები „დისლოკაციისთვის მზადყოფნის“ რეჟიმში გადაიყვანა. პენტაგონის ეს ნაბიჯი მოჰყვა აშშ-ის პრეზიდენტის, დონალდ ტრამპის მუქარას, აამოქმედოს „ამბოხების შესახებ კანონი“ (Insurrection Act), თუ შტატის ხელისუფლება არ შეაჩერებს მომიტინგეებს, რომლებიც საემიგრაციო სამსახურის თანამშრომლებს ესხმიან თავს.

ხუთშაბათს, თავის Truth Social-ის ანგარიშზე გამოქვეყნებულ პოსტში ტრამპმა განაცხადა: „თუ მინესოტას კორუმპირებული პოლიტიკოსები კანონს არ დაემორჩილებიან და არ აღკვეთენ პროფესიონალი პროვოკატორებისა და მეამბოხეების თავდასხმებს I.C.E.-ის (საემიგრაციო და საბაჟო კონტროლი) პატრიოტებზე, რომლებიც მხოლოდ თავიანთ საქმეს აკეთებენ, მე ავამოქმედებ ამბოხების შესახებ კანონს“.

პენტაგონსა და თეთრ სახლს აღნიშნულ საკითხზე კომენტარის გაკეთების მოთხოვნაზე ჯერჯერობით პასუხი არ გაუციათ.