თურქეთმა დღემდე ხუთ კონტინენტზე 85 ქვეყანასა და საზოგადოებას გაუწია დახმარება საერთაშორისო ჰუმანიტარული საქმიანობის ფარგლებში, რომლის კოორდინაციასაც ქვეყნის შინაგან საქმეთა სამინისტროს დაქვემდებარებაში მყოფი კატასტროფების და საგანგებო სიტუაციების მართვის სამმართველო (AFAD) ახორციელებს.
AFAD აგრძელებს სამძებრო-სამაშველო ოპერაციებსა და ჰუმანიტარულ საქმიანობას არა მხოლოდ თურქეთში, არამედ მსოფლიოს სხვადასხვა რეგიონში, რაც მისი „კატასტროფების დიპლომატიის“ მცდელობების ნაწილია.
AFAD-ის კოორდინაციით, თურქეთმა ხუთი კონტინენტის ქვეყნებსა და საზოგადოებებს მიაწოდა საკვები, თავშესაფარი, ჯანდაცვის საშუალებები და პირველადი საჭიროების ნივთები, ასევე ფინანსური დახმარება, ლოგისტიკური მხარდაჭერა და სამძებრო-სამაშველო აღჭურვილობა.
სააგენტო „ანადოლუს“ მიერ მოპოვებული ინფორმაციით, თურქეთის ერთ-ერთი უდიდესი საერთაშორისო ჰუმანიტარული ოპერაცია ღაზის სექტორისთვის განხორციელდა. ისრაელის თავდასხმების შედეგად დაზარალებულ რეგიონში, AFAD-ის კოორდინაციით, 14 თვითმფრინავისა და 21 გემის მეშვეობით სულ 109 332 ტონა ჰუმანიტარული დახმარება იქნა მიწოდებული.
ამ დახმარების ფარგლებში გაიცა სულ 7,5 მილიონი დოლარის შემოწირულობა, საიდანაც 7 მილიონი დოლარი AFAD-მა, ხოლო 500 000 დოლარი თურქეთის „წითელმა ნახევარმთვარემ“ გამოყო.
ავღანეთისთვის გაწეული ჰუმანიტარული დახმარების ფარგლებში, „სიკეთის მატარებლის“ (Kindness Train) 25 რეისით გაიგზავნა 11 739 ტონა დახმარება. გარდა ამისა, ამ ქვეყნისთვის ექვსი სატვირთო ავიარეისიც დაიგეგმა.
სუდანმა მიიღო 10 206 ტონა ჰუმანიტარული ტვირთი და 30 000 კარავი, რომლებიც ექვსი გემით იქნა ტრანსპორტირებული. თურქეთმა ასევე გაგზავნა 9 079 ტონა ჰუმანიტარული დახმარება პაკისტანში, 3 000 ტონა სომალიში და 730 ტონა ლიბანში.
ბანგლადეშმა მიიღო 64 992 ჰუმანიტარული ამანათი, ხოლო ბოსნია და ჰერცეგოვინას გადაეცა 60 კონტეინერის ტიპის სახლი, ასევე საწვავი, ჰიგიენური საშუალებები, გენერატორები და პირველადი მოხმარების ნივთები. დღემდე სირიაში ჰუმანიტარული დახმარებით დატვირთული 13 938 სატვირთო მანქანაა გაგზავნილი.
ზამბიამ მიიღო 25 000 დოლარის ღირებულების დახმარება და 600 საკვები ამანათი, კონგოს დემოკრატიულ რესპუბლიკას 54 070 დოლარის, ხოლო ბურუნდის 60 000 დოლარის ღირებულების დახმარება გაეწია.
თურქეთის ერთ-ერთი ბოლო საერთაშორისო ჰუმანიტარული ოპერაცია ვენესუელაში განხორციელდა. ივნისში მომხდარი 7,2 და 7,5 მაგნიტუდის სიმძლავრის ორი მიწისძვრის შემდეგ, პრეზიდენტ რეჯეფ თაიფ ერდოღანის მითითებითა და AFAD-ის კოორდინაციით, რეგიონში ორი სამხედრო-სატვირთო თვითმფრინავით ჰუმანიტარული ტვირთი გაიგზავნა.
ეს გზავნილი მოიცავდა AFAD-ის მიერ მიწოდებულ 275 კარავს და ჯანდაცვის სამინისტროს მიერ გამოყოფილ შვიდ ტონა სამედიცინო აღჭურვილობას. ვენესუელაში სულ 30 ტონა ჰუმანიტარული დახმარების მასალა იქნა მიწოდებული.
