ევროპული საავიაციო კომპანიები Airbus-ი, Thales-ი და Leonardo სატელიტური ბიზნესების შესაძლო გაერთიანების შესახებ მოლაპარაკებებს აწარმოებენ და ოთხშაბათს ევროკავშირის კონკურენციის საკითხებზე პასუხისმგებელ პირს, ტერეზა რიბერას შეხვდებიან. ეს ინფორმაცია ევროკომისიის დღის წესრიგში აისახა.
სამი კომპანიის მიერ ერთობლივი კოსმოსური კომპანიის დაარსების წინასწარი გეგმები ილონ მასკის Starlink-თან კონკურენციის გაწევის მცდელობების ფარგლებში განიხილება. ამჟამად ევროკავშირის კონკურენციის სფეროს წარმომადგენლებთან წინასწარი მოლაპარაკებები მიმდინარეობს; ეს ნაბიჯი, როგორც წესი, შერწყმის შეთანხმებებზე ოფიციალური თანხმობის მოთხოვნამდე იდგმება.
აღინიშნება, რომ მოლაპარაკებები ჯერ კიდევ ძალიან ადრეულ ეტაპზეა და არ არის მოსალოდნელი, რომ ეს პროცესი კონკრეტული შედეგით მომავალი წლის გვიან ეტაპამდე დასრულდება. ეს ინფორმაცია გასულ თვეს Reuters-მა წყაროზე დაყრდნობით გაავრცელა.
ზოგადად, კომპანიების აღმასრულებელი დირექტორები ევროკავშირის კონკურენციის სფეროს წარმომადგენლებს ხვდებიან, რათა მიაწოდონ ინფორმაცია გარიგებების შესახებ და მიიღონ მოსაზრებები მარეგულირებელ პროცესში მოსალოდნელ პოტენციურ დაბრკოლებებზე და იმ ზომებზე, რომლებიც შეიძლება იქნას მიღებული, განსაკუთრებით კონკურენციასთან დაკავშირებული შეშფოთების მოსახსნელად.
Airbus-ის აღმასრულებელმა დირექტორმა განაცხადა, რომ მოხარული იქნება, თუ Thales-თან და Leonardo-სთან სატელიტური გაერთიანების მოლაპარაკებები MBDA-ს ევროპული სარაკეტო პროექტის მსგავს ინიციატივას დაუდებს საფუძველს. მან ასევე იმედი გამოთქვა, რომ ევროკავშირის კონკურენციის მარეგულირებლები წარსულთან შედარებით უფრო მოქნილ მიდგომას გამოიჩენენ.
