უკრაინის საგანგებო სიტუაციების სამსახურმა ხუთშაბათს გაკეთებულ განცხადებაში აღნიშნა, რომ კიევზე რუსეთის მიერ განხორციელებული თავდასხმების შედეგად ორი ადამიანი დაიღუპა და სულ მცირე ხუთი დაშავდა, მათ შორის ერთი ბავშვია. თავდასხმები დედაქალაქში შუაღამის შმდეგ მალევე განხორციელდა.
მას შემდეგ, რაც უკრაინის სამხედრო-საჰაერო ძალებმა გაავრცელეს გაფრთხილება მრავალი ბალისტიკური რაკეტის მოახლოების შესახებ, კიევში მყოფმა AFP-ის ჟურნალისტებმა ერთმანეთის მიყოლებით აფეთქებების ხმა გაიგონეს.
დედაქალაქის ცაზე კაშკაშა ნათებების სერია გამოჩნდა და ზედიზედ მოხდა აფეთქებები. მერმა ვიტალი კლიჩკომ ხუთშაბათს Telegram-ზე დაწერა: „მტრის თავდასხმის შედეგად კიევში ორი ადამიანი დაიღუპა“.
უკრაინის სახელმწიფო საგანგებო სიტუაციების სამსახურმა განაცხადა, რომ ხუთი ადამიანი დაშავდა, ხოლო დარტყმები სვიატოშინსკისა და დარნიცკის რაიონებში განხორციელდა.
მერმა კლიჩკომ მანამდე სოციალური ქსელით გავრცელებულ განცხადებაში აღნიშნა, რომ დაიბომბა საწყობი და „რაკეტის ნამსხვრევები არასაცხოვრებელ შენობებს დაეცა“. ამავდროულად, მერის თქმით, უკრაინის ჩრდილო-აღმოსავლეთის მთავარი ქალაქი ხარკოვიც საბრძოლო უპილოტო საფრენი აპარატების სამიზნე გახდა.
თავდასხმა ევროკომისიის პრეზიდენტის, ურსულა ფონ დერ ლაიენის ვიზიტიდან რამდენიმე საათში მოხდა, რომელიც თავდაცვის სფეროში კავშირების გაძლიერების მიზნით განხორციელდა.
